सर्लाहीमा घर फोडेर गरगहना चोरी, तीन नाबालकसहित चारजना पक्राउ
रौतहट २० असोज। सर्लाहीको गोडैता नगरपालिका–६ गोडैता टोलमा घर फोडेर सुनचाँदीका गरगहना चोरी गरेको आरोपमा प्रहरीले तीन जना नाबालकसहित चार जनालाई पक्राउ गरेको छ।
गत १३ गते स्थानीय नरेश मिश्रको दुई तले पक्की घरको माथिल्लो तलाको सिरानको झ्याल खुला रहेको अवस्थामा चोर घरभित्र प्रवेश गरी दराज र सुटकेशमा राखिएका सुनचाँदीका गरगहना चोरी गरेको प्रहरीले जनाएको छ। चोरी भएका गरगहनाको मूल्य करिब ५ लाख ७८ हजार २ सय रुपैयाँ बराबर रहेको थियो।
घटनाको सूचना पाएलगत्तै प्रहरी चौकी गोडैताबाट खटिएको टोलीले चोरीमा संलग्न व्यक्तिको खोजी थालेको थियो। अनुसन्धानका क्रममा गत आइतबार गोडैता क्षेत्रबाट चोरीमा संलग्न तीन जना नाबालक र चोरीका सामान खरिद गर्ने एक जना व्यक्ति पक्राउ परेका हुन्।
प्रहरीले उनीहरूको साथबाट चोरी भएका विभिन्न सुनचाँदीका गरगहना समेत बरामद गरेको जनाएको छ।
बरामद सामानमा—
चाँदीको पायल २ थान
सुनको जितिया ४ थान
सुनको औंठी १ थान
चाँदीको टेका २ थान
चाँदीको लक्ष्मीको फोटो भएको सिक्का २ थान
चाँदीको हनुमानी १ थान
सुनको लेडिज औंठी १ थान
पक्राउ परेकाविरुद्ध चोरीसम्बन्धी कसुरमा मुद्दा दर्ता गरी थप अनुसन्धान भइरहेको जिल्ला प्रहरी कार्यालय सर्लाहीका प्रहरी प्रवक्ता तथा सूचना अधिकारी वेदप्रसाद गौतमले मंगलबार जारी गरेको सूचनामा उल्लेख छ।
