भोजपुरमा ८८ प्रतिशत रोपाइँ
टक्सार (भोजपुर), १७ भदौ । पूर्वीपहाडी जिल्ला भोजपुरमा ८८ प्रतिशत रोपाइँ सकिएको छ । जिल्लाको कूल खेतीयोग्य जमिन ६२ हजार दुई सय ९९ हेक्टर रहेको छ ।
कृषि विकास निर्देशनालय प्रदेश नम्बर १ विराटनगका अनुसार भोजपुरमा धान लगाउने क्षेत्रफल १८ हजार ९२ रहेको छ । जसमा १५ हजार नौ सय २० हेक्टर क्षेत्रफलमा धान रोपाइँ भएको छ । भोजपुरको देउराली, टक्सार, कोट, बोखिम, गुप्तेश्वर, मूलपानीलगायत ठाउँलाई धानका लागि पकेट क्षेत्र मानिएको छ ।
प्रदेश १ मा भने हालसम्म करिब ८९ प्रतिशत धान रोपाइँ भएको छ । आठ लाख २६ हजार छ सय ४६ कूल खेतीयोग्य जमिन प्रदेश १ मा छ । धान लगाउने क्षेत्रफल तीन लाख ४० हजार आठ सय २९ मध्ये तीन लाख एक हजार चार सय १९ हेक्टर क्षेत्रफलमा अहिलेसम्म रोपाइँ भएको कृषि विकास निर्देशनालय प्रदेश नम्बर १ विराटनगले जनाएको छ । (रासस)
अवरुद्ध सिद्धार्थ राजमार्ग सञ्चालनमा
रामपुर (पाल्पा), १७ भदौ (रासस) :बिहीबारदेखि अवरुद्ध बनेको सिद्धार्थ राजमार्गअन्तर्गत पाल्पा–बुटवल सडकखण्ड अहिले एकतर्फी सञ्चालनमा आएको छ । पाल्पाको तिनाउ गाउँपालिका–५ हिउँदेखोलामा भासिएको सडक मर्मतपश्चात् अहिले एकतर्फी रूपमा सडक सञ्चालन भएको जिल्ला प्रहरी कार्यालय पाल्पाले जनाएको छ ।
निरन्तर परेको वर्षाका कारण मुख्य सडक भासिँदा बिहीबार दिउँसोदेखि सडकखण्ड अवरुद्ध बनेको हो । गए राति नयाँ डाइभर्सन निर्माणपश्चात् केही समय एकतर्फी चलेको सडक अविरल वर्षाका कारण पुनः अवरुद्ध भएको थियो । आज अपराह्नदेखि सडक खुलेको जिल्ला प्रहरी कार्यालय पाल्पाले जनाएको छ ।
हिउँदेखोला क्षेत्रमा करिब ४० मिटर जमिनसहित सडक भासिएर बिहीबारदेखि नै राजमार्ग ठप्प बनेको हो । पहिरो खसिरहेकाले यस क्षेत्रमा जोखिम बढेको छ । सडक खुल्न थालेपछि बीच बाटोमै रोकिएका सवारीसाधन आफ्नो गन्तव्यतर्फ लागेका छन् । यही सडक भएर बुटवल, भैरहवा, पोखरा, गुल्मी, स्याङ्जा, पाल्पालगायत जिल्लामा सवारी साधन गुड्ने गर्दछन् ।
