सजिलै आउने पैसा छोडेका गृहमन्त्रीले सुन तस्करीमा लोभ गरे भन्ने मलाई लाग्दैनः कांग्रेस नेता भण्डारी
काठमाडौं, २२ साउन । नेपाली कांग्रेसका नेता डा. चन्द्रकान्त भण्डारीले सुन तस्करी प्रकरण छानविनका लागि उच्चस्तरीय छानविन समिति बनाउन आवश्यक नरहेको बताएका छन् । हिजो (आईतबार) प्राइम टाइम्स टेलिभिजनको ‘जनता जान्न चाहन्छन्’ कार्यक्रममा पत्रकार ऋषि धमलासँग संवाद गर्दै उनले उक्त प्रकरण छानविनका लागि नेपाल प्रहरीको सिआईबी सक्षम रहेको बताएका हुन् ।
‘हाम्रा यस्ता छानविनका काम नेपाल प्रहरीको सिआईबीले गर्छ । प्रहरी हाम्रो राम्रो छ । इन्भेष्टिगेनमा पनि राम्रो छ । साधन स्रोत हामीले उपलब्ध गरायौं र इन्टरफियर गरेनौं भने प्रहरीले गर्न सक्छ,’– उनले भने ।
सुन तस्करी प्रकरणमा अहिले नै गृहमन्त्री नारायणकाजी श्रेष्ठमाथि आसंका गर्नुपर्ने कारण नरहेको बताए । गृहमन्त्रीले मन्त्रालयमा आफूले खर्च गर्न पाउने रकमसमेत लिन नचाहेको बताउँदै उनले गृहमन्त्री दुई चार करोडको लोभमा परे होलान् भनेर विश्वास गर्न नसकिने बताए ।
‘गृहमन्त्री एउटा गृहस्थी विहीन माओवादीको नेता । उनी गृहमन्त्री हुँदाको दिन गृहमन्त्रीले खर्च गर्न पाउने पैसा करोडौं हुन्छ । उनले म यो लिन्न भनेका छन् । सजिलै आउने पैसा छोडेको मान्छेले सय किलो सुनमा दुई चार करोडका निम्ति किन लोभ गरे होलान् र भन्ने मलाई लाग्छ ।’ उनले भने, ‘उनले किन अनुसन्धानमा इन्टरफियर गर्छन् र भन्ने मलाई लाग्छ । किनभने उनले त्यही पैसा लिएको भए निस्कने बेलासम्म २४÷२५ करोड त खान पाउँथे नि । त्यसकारण केही समय विश्वास गरौं ।’
उच्चस्तरीय छानविन आयोगमा पार्टीका विभिन्न मान्छे राखिने र आफ्ना मान्छे पर्न थाले भनेपछि त्यहाँ बराबरी गराएर मिलाउने उनले बताए । राजनीतिक दलले हस्तक्षेप नगरेको खण्डमा सिआईबीले अनुसन्धान निष्कर्षमा पुर्याउन सक्ने उनको दाबी छ ।
