संसदमा एमालेले जे गरिरहेको छ, गलत गरिरहेको छ : रास्वपा
काठमाडौं । राष्ट्रिय स्वतन्त्र पार्टी (रास्वपा)ले संघीय संसदमा जारी अवरोधप्रति असन्तुष्टि जनाएको छ ।
रास्वपाका उपसभापति डोलप्रसाद अर्याल बैठक चल्न नदिने र सूचना टाँसेर बैठक स्थगित गराउने प्रवृति देखा परेको बताउँछन् । ‘संसदमा एमालेले जे गरिरहेको छ गलत गरिराखेको छ’ उपसभापति अर्यालले अनलाइनखबरसँग भने ।
राजश्व अनुसन्धान विभागले साउन २ गते त्रिभुवन विमानस्थलबाट गैरकानुनी रुपमा नेपाल भित्रिएको झण्डै एक सय किलो सुन बरामद गरेको थियो ।
यस सम्बन्धमा उच्चस्तरीय छानबिन समिति गठनको माग गर्दै एमालेले साउन १० गते यता संघीय संसदको दुवै सदन (प्रतिनिधि सभा र राष्ट्रिय सभा)को बैठक चल्न दिएको छैन ।
संसदको अवरोध खुलाउने विषयमा एमाले बाहेकका रास्वपा र राप्रपालाई समेत छलफलमा बोलाएर सहमति खोज्ने प्रयास प्रधानमन्त्री पुष्पकमल दाहाल प्रचण्ड समेत नगरकोप्रति रास्वपा उपसभापति अर्यालको चित्त दुखाइ छ ।
‘संसदमा रहेका सबै दलहरुलाई विश्वासमा लिएर जाने काम प्रधानमन्त्रीको हो । तर स्वघोषित शीर्ष नेताहरु बसिरहनु भएको छ’ उनी अगाडि भन्छन्, ‘प्रमुख प्रतिपक्षी दलले पनि रास्वपा र राप्रपालाई देखेन । हामी आउँदा गाह्रो हुन्छ भनेर तर्सिनुभयो उहाँहरु ।’
संसदमा जारी अवरोध खुलाउने विषयमा प्रम्रुख तीन दल नेकपा माओवादी केन्द्र, नेकपा एमाले र नेपाली कांग्रेसका शीर्ष नेताहरु निरन्तर छलफलमा छन् ।
प्रधानमन्त्री प्रचण्ड, नेपाली कांग्रेसका सभापति शेरबहादुर देउवा, प्रमुख विपक्षी दल एमालेका अध्यक्ष केपी शर्मा ओली, प्रमुख तीन दलका प्रमुख सचेतक र सचेतकहरु दिउँसो १२ बजे सिंहदरवारस्थित सभामुख देवराज घिमिरेको कार्यकक्षमा बसेका थिए ।
उक्त बैठक दिउँसो १ बजेका लागि तय भएको प्रतिनिधि सभाको बैठक दिउँसो ४ बजेका लागि सार्ने सहमति गर्दै सकिएको थियो ।
दिउँसो साढे ३ बजे शीर्ष नेताहरु पुनः संसद भवनस्थित नयाँ वानेश्वरमा छलफलमा जुटेका थिए । दोस्रो बैठक पनि बिना निस्फल भएपछि सोमबार तय भएको प्रतिनिधि सभाको बैठक बस्दै नबसी मंगलबार दिउँसो ३ बजेसम्मका लागि स्थगित भएको छ । कुनै पनि छलफलमा प्रमुख तीन दल बाहेकका नेताहरु सहभागी छैनन् ।
