पोखरीमा डुबेर दाजुभाइको मृत्यु
कृष्णनगर : कपिलवस्तुको कृष्णनगर नगरपालिका–५ बगहीका एकै घरका दाजुभाइको पोखरीमा डुबेर मृत्यु भएको छ। उक्त गाउँका रामअवतार यादवका छोरा सात वर्षीय साजन र पाँच वर्षीय राजन घर नजिकैको पोखरीमा डुबेर मृत्यु भएको इलाका प्रहरी कार्यालयका प्रहरी निरीक्षक लक्ष्मण ओलीले जानकारी दिए।
खोजतलास गर्ने क्रममा बुधबार बिहान ७ बजे डुबेको अवस्थामा उनीहरुको शव फेला परेको थियो। माटो निकालेर पानी जमेको पोखरीमा दाजुभाइको शव फेला परेको उनले जानकारी दिए।
मंगलबार बेलुकादेखि हराएका दाजुभाइ घर नजिकैको पोखरीमा मृतावस्थामा फेला परेपछि तौलिहवा जिल्ला अस्पतालमा शव परीक्षण गरी परिवारको जिम्मा लगाइएको र घटनाको विषयमा थप अनुसन्धान भइरहेको प्रहरीले जनाएको छ। रासस
