धनकुटा जिल्लालाई गरियो पूर्ण खोप सुनिश्चितता तथा दिगोपना घोषणा
धनकुटा,२५ असार । धनकुटा जिल्लालाई पूर्ण खोप सुनिश्चितता तथा दिगोपना घोषणा गरिएको छ । जिल्लाका ५९ महिनासम्मका सबै बालबालिकालाई विभिन्न १३ प्रकारका खोप लगाइसकेपछि मंगलबार पूर्ण खोप सुनिश्चितता तथा दिगोपना घोषणा गरिएको हो ।
जिल्लाका ५९ महिनाभित्रका ६ हजार ६ सय ९३ जना बालबालिकालाई विभिन्न १३ प्रकारका खोप लगाइसकेपछि जिल्ला समन्वय समिति धनकुटाका प्रमुख निरेन तामाङले जिल्लालाई पूर्ण खोप सुनिश्चितता तथा दिगोपना घोषणा गर्नुभएको हो ।
यस अघि जिल्लास्थित स्थानीय तहहरूलाई पूर्ण खोप सुनिश्चितता घोषणा गरिसकेपछि मंगलबार जिल्लालाई समेत घोषणा गरिएको स्वास्थ्य कार्यालय धनकुटाका प्रमुख योगराज घिमिरेले जानकारी दिनुभयो ।
कार्यक्रममा जिल्ला समन्वय समिति धनकुटाका उपप्रमुख सावित्रा राई, प्रमुख जिल्ला अधिकारी पूण्यविक्रम पौडेल, प्रदेश स्वास्थ्य निर्देशक ज्ञानबहादुर बस्नेत ,धनकुटा नगरपालिकाका प्रमुख प्रशासकीय अधिकृत दशरथ राई, विभिन्न संघसस्थाका प्रमुख एवं प्रतिनिधि ,सुरक्षा निकायका प्रमुख पत्रकार तथा स्वास्थ्यकर्मीहरुको उपस्थिती रहेको थियो ।
