ताप्लेजुङको पाथीभरामा ‘नो केबलकार’ को आन्दोलन स्थगित, यस्तो छ सरकारसँगको ६ बुँदे सहमति
काठमाडौं । ताप्लेजुङको पाथीभरामा केबलकार निर्माण गर्न नहुने भन्दै जारी आन्दोलन स्थगित हुने भएको छ ।
मंगलबार सरकारसँग ६ बुँदे सहमति भएसँगै आन्दोलनकारीले आफ्ना कार्यक्रम फिर्ता लिएका हुन् । अहिलेलाई केबलकार स्टेसन माथिको निर्माण कार्य स्थगन गरी स्टेसनका सन्दर्भमा आगामी वार्तामा विस्तृत छलफल गर्न सरकारी पक्ष तयार भएको छ।
मंगलबार लगभग दिनभरि भएको वार्तापछि यस्तो सहमति भएको हो। यसअघि सोमबार पनि दुई पक्षबीच सात घन्टाभन्दा बढी वार्ता भएको थियो।
यस्तो छ सहमतिः
१। पाथीभरा केबलकारको स्टेसनमाथिको निर्माण कार्य स्थगन गर्ने र स्टेसनका सन्दर्भमा आगामी वार्तामा विस्तृत छलफल गर्ने ।
२। सरकारले घोषणा गरे बमोजिम आन्दोलनका क्रममा घाइते भएकाहरुको निःशुल्क र प्रभावकारी रुपमा स्वास्थ्य उपचार गर्ने ।
३। २०८१ माघ १२ गते भएको घटनाको विषयमा छानबिन गरी कानुनी कारबाही गर्ने ।
४। आन्दोलनका क्रममा थुनामा रहेका थुनुवा बन्दीहरुको विना शर्त तत्काल रिहाइको प्रक्रिया प्रारम्भ गर्ने ।
५। मुक्कुमलुङ संरक्षक पक्षबाट अनिश्चितकालीन यातायात बन्द स्थगन गर्ने ।
६। मुक्कुमलुङ संरक्षक पक्षधरहरुबाट वार्ताका दौरानमा माग भएका पाथीभरा केबलकार आयोजना निर्माणमा रहेका असहमति लगायतका विषयका सम्बन्धमा विस्तृत छलफल गर्न अर्को वार्ता मिति २०८१ माघ २७ गते बिहान ११ बजे आयोजना गर्ने ।
