पूर्व राष्ट्रपति भइसकेको व्यक्ति राजनीतिमा आउन नहुने :मुख्यमन्त्री कार्की
धनकुटा,३० साउन । कोशी प्रदेशका मुख्यमन्त्री हिक्मत कुमार कार्कीले पूर्व राष्ट्रपतिलाई सम्मानित रुपमा व्यवहार गर्नुपर्ने बताएका छन् ।
शुक्रबार धनकुटामा अखिल नेपाल महिला संघले आयोजना गरेको कार्यक्रमलाई सम्बोधन गर्दै मुख्यमन्त्री कार्कीले पूर्व राष्ट्रपति भइसकेको व्यक्ति राजनीतिमा आउन नहुने चर्चा गर्दै उनलाई सम्मानित व्यवहार गरेर अगाडि बढ्नुपर्ने धारणा राखे ।
नेकपा एमाले निर्माणमा पूर्व राष्ट्रपति विद्यादेवी भण्डारीको योगदान उल्लेख्य रहेको चर्चा गर्दै उनको योगदानलाई हामीले सम्मान गर्नुपर्ने मुख्यमन्त्री कार्कीले बताए ।
मुख्यमन्त्री कार्कीले कोशी प्रदेश सरकारले उद्दमशीलता विकासका लागि विभिन्न काम गरेको जानकारी पनि दिए । सो अवसरमा उनले बिना धितो ऋण दिलाउने व्यवस्था गरेर प्रदेश सरकारले काम गरिरहेको बताए ।
मुख्यमन्त्री कार्कीले भने, ‘अब तपाईहरुले नयाँ र राम्रो खालको उद्यम गर्न चाहनुहुन्छ भने तपाईंहरूको परियोजना हेरेर बैंकले ऋण दिन्छ त्यो ऋणको ब्याज प्रदेश सरकारले तिरिदिन्छ ऋण लिँदा धितो राख्नु पर्दैन ।’
