जेनजी वार्ता समितिको माग : अन्तरिम संविधान बनाएर प्रत्यक्ष कार्यकारी निर्वाचन होस्
काठमाडौ । राष्ट्रपतिसँग वार्ता गर्न गठन गरिएको जेनजी वार्ता समितिले अन्तरिम संविधान निर्माण गरी प्रत्यक्ष कार्यकारी प्रमुखको निर्वाचन गर्नुपर्ने माग अघि सारेको छ।
समितिले आइतबार आयोजित पत्रकार सम्मेलनमार्फत यस्तो अडान सार्वजनिक गरेको हो।
वार्ता समितिका सदस्य प्रवेश दाहालले वर्तमान संविधान आफूहरूले मान्न नसक्ने बताए। उनले यो संविधानलाई खारेज गर्ने अधिकार सरकारसँगै रहेको भन्दै अन्तरिम संविधानमार्फत नयाँ राजनीतिक अभ्यास गर्नुपर्नेमा जोड दिए।
दाहालका अनुसार, आन्दोलनले विगतमा राजतन्त्रलाई हटाएको थियो, त्यसरी नै प्रत्यक्ष कार्यकारी निर्वाचन गर्न कुनै रोकटोक नभएको दाबी गरिएको छ।
उनले हालको सरकार संवैधानिक हैसियतमा नभई असंवैधानिक तरिकाले बनेको आरोपसमेत लगाउँदै आन्दोलनको ‘सेफ ल्यान्डिङ’का लागि अन्तरिम संविधान नै उपयुक्त विकल्प हुने बताएका छन्।
