नेपाली कांग्रेस उर्लाबारीद्वारा १ हजार १ सदस्यीय नगरस्तरीय निर्वाचन परिचालन समिति गठन
उर्लाबारी । नेपाली कांग्रेस उर्लाबारी नगर समितीले आगामी फागुन २१ गते हुने प्रतिनिधिसभा निर्वाचनलाई लक्षित गर्दै नगरस्तरीय निर्वाचन परिचालन समिती गठन गरेको छ ।
आइतबार उर्लाबारीस्थित पार्टी प्यालेसमा सम्पन्न नगरस्तरीय बैठकले पार्टी संगठनलाई निर्वाचनमुखी बनाउँदै अभियानलाई प्रभावकारी रूपमा अघि बढाउने उद्देश्यसहित समिती गठनको निर्णय गरेको हो ।
बैठकले नेपाली कांग्रेस उर्लाबारी नगर सभापति सुरेन्द्र लिम्बुको संयोजकत्वमा निर्वाचन परिचालन समिती गठन गरेको छ ।सो समितीको सह–संयोजकमा पार्टीका महाधिवेशन प्रतिनिधी दिपेन्द्र धिमाल र सोम प्रसाद तिम्सीना (राम) चयन भएका छन् ।
त्यस्तै, सचिवको जिम्मेवारी नारायणप्रसाद आर्चायलाई दिइएको छ भने कोषाध्यक्षसहित १ हजार १ सदस्यीय नगरस्तरीय निर्वाचन परिचालन कमिटी गठन गरिएको नगर समितीले जनाएको छ ।
बैठकमा वर्तमान राजनीतिक परिस्थिति, बदलिँदो सामाजिक परिवेश र जनअपेक्षालाई मध्यनजर गर्दै नेपाली कांग्रेसले नीति र नेतृत्व दुवैमा समयसापेक्ष सुधार गर्दै चुनावी मैदानमा होमिएको निष्कर्ष निकालिएको छ ।
सोही रणनीतिअनुसार मोरङ क्षेत्र नम्बर १ का प्रतिनिधिसभा उम्मेदवार खड्ग फागोलाई भारी मतका साथ विजयी गराउने लक्ष्यसहित पार्टी संगठनलाई चलायमान बनाइने जनाइएको छ ।
नगरस्तरमा गठन गरिएको निर्वाचन परिचालन समितीले टोल, वडासम्म संगठन विस्तार, मतदाता भेटघाट, घरदैलो कार्यक्रम, प्रचार–प्रसार तथा जनसम्पर्क अभियानलाई तीव्रता दिने बताइएको छ ।
बैठकमा सहभागी नेताहरूले पार्टीभित्रको एकता मजबुत बनाउँदै कांग्रेसको जित सुनिश्चित गर्न सबै कार्यकर्ता जिम्मेवारीपूर्वक परिचालित भएर लाग्ने प्रतिबद्धता व्यक्त गरेका छन् ।
त्यसैगरी, मोरङ–१ अन्तर्गत पर्ने मिक्लाजुङ, लेटाङ र केराबारी गाउँपालिकामा समेत निर्वाचन परिचालन समिती गठन गरी रणनीतिक रूपमा चुनावी अभियान सञ्चालन गरिने बैठकमा उपस्थित नेताहरुले बताएका छन् ।
नेपाली कांग्रेसले लोकतान्त्रिक मूल्य, सुशासन र विकासको एजेण्डालाई केन्द्रमा राख्दै जनताको विश्वास जित्ने दृढ संकल्पसहित निर्वाचनमा सहभागी हुने जनाएको छ ।
