कागजमा होइन, अनुभूत हुने विकास मेरो लक्ष्यः कुशल लिम्बू
मोरंग । मोरङ क्षेत्र नं. १ बाट नेपाली कम्युनिष्ट पार्टीका प्रतिनिधिसभा सदस्य उम्मेद्वार कुशल लिम्बूले कागजी योजनाभन्दा जनताले प्रत्यक्ष अनुभूति गर्ने विकास आफ्नो मुख्य लक्ष्य रहेको बताएका छन् ।
घरदैलो तथा भेटघाट कार्यक्रममा सक्रिय लिम्बूले गाउँ–गाउँमा राज्यको पहुँच पुर्याउने र मोरङ–१ लाई अग्रगतितर्फ लैजाने स्पष्ट संकल्प व्यक्त गरेका छन् ।
बुधबार लिम्बूसहित समानुपातिक उम्मेद्वार ममता राजवंशी तथा पार्टीका नेता–कार्यकर्ताले उर्लाबारी–५, ६ र ७ का विभिन्न क्षेत्रमा घरदैलो तथा भेटघाट कार्यक्रम सञ्चालन गरेका छन् । सो क्रममा स्थानीय बासिन्दासँग प्रत्यक्ष संवाद गर्दै उनीहरूले मतदातासँग समर्थन र सहयोगको अपिल गरेका थिए।
उम्मेद्वार लिम्बूले मतदातालाई तारा चिन्हमा मतदान गर्न आग्रह गर्दै भने, “तपाईंहरूले दिएको विश्वास मेरो शक्ति हो । त्यो विश्वास म कहिल्यै टुट्न दिने छैन ।” उनका अनुसार अहिले मोरङ–१ लाई नेता मात्र नभई जनताको पीडा बुझ्ने जिम्मेवार प्रतिनिधि आवश्यक रहेको छ ।
लिम्बूले मोरङ–१ को दीर्घकालीन विकासका लागि रोजगारी सिर्जना, आधारभूत पूर्वाधार विस्तार, शिक्षा तथा स्वास्थ्य सेवामा पहुँच वृद्धि आफ्नो प्राथमिकतामा रहेको उल्लेख गरे ।
