ओलीलाई धिमाल समुदायद्वारा भव्य स्वागत
दमक । नेपाल कम्युनिस्ट पार्टी (एमाले)का अध्यक्ष केपी शर्मा ओलीलाई दमक नगरपालिका–४ स्थित अडियामलमा धिमाल समुदायले भव्य स्वागत तथा अभिनन्दन गरेको छ।
आइतबार आयोजित विशेष कार्यक्रममा स्थानीय आदिवासी धिमाल समुदायले आफ्नो परम्परागत भेषभूषा, बाजागाजा र सांस्कृतिक प्रस्तुतिमार्फत अध्यक्ष ओलीप्रति सम्मान व्यक्त गरेका थिए। समुदायका अगुवाहरूले जातीय पहिचानको संरक्षण, भाषा–संस्कृतिको प्रवर्द्धन, शिक्षा तथा रोजगारीका अवसर विस्तारलगायतका विषयमा अध्यक्ष ओलीसँग छलफल गर्दै आफ्ना अपेक्षा राखेका थिए।
कार्यक्रमलाई सम्बोधन गर्दै अध्यक्ष ओलीले धिमाल समुदायको आत्मीय स्वागतप्रति आभार व्यक्त गर्दै आदिवासी जनजातिको अधिकार, कला र संस्कृतिको संरक्षणमा पार्टी सधैँ प्रतिबद्ध रहेको बताए। उनले स्थानीय विकास निर्माण, पूर्वाधार विस्तार र सामाजिक समावेशिताका कार्यक्रमलाई अझ प्रभावकारी रूपमा अघि बढाइने प्रतिबद्धता पनि जनाए।
उक्त कार्यक्रममा एमालेका स्थानीय नेता, जनप्रतिनिधि तथा कार्यकर्ताहरूको उल्लेखनीय उपस्थिति रहेको थियो। कार्यक्रममा धिमाल समुदायका युवाहरूले सांस्कृतिक नृत्य प्रस्तुत गरी वातावरणलाई उत्साहपूर्ण बनाएका थिए।
