धनकुटामा प्रमुख जिल्ला अधिकारीद्वारा तमोर करिडोर र पुल आयोजनाको निरीक्षण, विपद्का लागि तयारी अवस्थामा रहन निर्देशन
धनकुटा । धनकुटाका प्रमुख जिल्ला अधिकारी रूद्रादेवी शर्मा सहित जिल्ला सुरक्षा समितिका पदाधिकारीहरूले गत साउन ७ गते तमोर करिडोरअन्तर्गत मूलघाटदेखि नावाखोलासम्मको सडक तथा पुल आयोजनाको स्थलगत निरीक्षण गरेका छन्।
निरीक्षणका क्रममा निर्माण कार्यलाई निर्धारित समयमै सम्पन्न गर्न, विपद्को समयमा आवश्यक उपकरण तथा जनशक्ति तयारी अवस्थामा राख्न, सडकमा बनेका खाल्टा–खुल्टी तत्काल पुर्न तथा राजमार्गमा सवारीसाधनको आवागमन निर्वाध रूपमा सञ्चालन हुने व्यवस्था मिलाउन सम्बन्धित निकायलाई निर्देशन दिइएको छ।
त्यसैगरी टोलीले फलामेटार प्रहरी चौकी, मूलघाट प्रहरी चौकी तथा सशस्त्र प्रहरी बलको मूलघाटस्थित विपद् व्यवस्थापन गुल्मको समेत निरीक्षण गरेको थियो।
निरीक्षणका क्रममा वर्षायाममा हुन सक्ने प्राकृतिक विपद्लाई ध्यानमा राखी उद्धार तथा राहतका लागि आवश्यक तयारी चुस्त राख्न सुरक्षा निकायलाई निर्देशन दिइएको जनाइएको छ।
