धनकुटाका एक युवक १०८ ग्राम ब्राउन सुगर सहित सुनसरीबाट पक्राउ
इनरुवा । सुनसरी प्रहरीले १०८.०३ ग्राम ब्राउन सुगरसहित धनकुटाका एक जनालाई पक्राउ गरेको छ।
जिल्ला प्रहरी कार्यालय सुनसरीका अनुसार शुक्रबार बिहान करिब ५ः५० बजे भोक्राहा नरसिंह गाउँपालिका–६ इस्राइल कामत क्षेत्रमा भारतबाट नेपालतर्फ पैदल आउँदै गरेका धनकुटा नगरपालिका–१ निवासी ३५ वर्षीय मनबहादुर थापालाई शंकाको आधारमा जाँच गरिएको थियो।
प्रहरी चौकी नरसिंहटप्पुबाट खटिएको टोलीले उनको साथबाट चार वटा पोकामा लुकाइराखिएको ब्राउन सुगरजस्तो देखिने पदार्थ बरामद गरेको हो। बरामद पदार्थमध्ये ३८.१३ ग्राम, ३७.३१ ग्राम, ३०.७५ ग्राम र १.८४ ग्राम गरी कुल १०८.०३ ग्राम रहेको प्रहरीले जनाएको छ।
बरामद लागूऔषधसहित थापालाई नियन्त्रणमा लिई जिल्ला प्रहरी कार्यालय सुनसरीमा राखेर लागूऔषध सम्बन्धी कसुरमा थप अनुसन्धान भइरहेको प्रहरीले जनाएको छ।
