मिनी ट्रकको छतमा लुकाइएको ४५४ किलो गाँजासहित चालक पक्राउ
महोत्तरी — मिनी ट्रकको छतमा फल्स बटम (कृत्रिम तह) बनाएर लुकाइछिपाइ राखिएको ४५४ किलोग्राम गाँजासहित एक जनालाई प्रहरीले पक्राउ गरेको छ।
लागुऔषध नियन्त्रण ब्युरो शाखा कार्यालय बर्दिवासबाट खटिएको प्रहरी टोलीले शुक्रबार (साउन १२) सिन्धुलीको भिमानबाट महोत्तरीतर्फ जाँदै गरेको बा ४ ख ५६९२ नम्बरको मिनी ट्रकलाई महोत्तरीको बर्दिबास नगरपालिका–३ मा शंका लागेर रोकी जाँच गरेको थियो।
जाँचका क्रममा ट्रकको छतमा फल्स बटम बनाई ६० वटा पोकामा लुकाइछिपाइ राखिएको ४५४ किलोग्राम गाँजा बरामद गरिएको प्रहरीले जनाएको छ।
घटनामा संलग्न रहेको आरोपमा ललितपुरको गोदावरी नगरपालिका–३ निवासी २६ वर्षीय विश्व तामाङलाई पक्राउ गरिएको छ। उनलाई आवश्यक अनुसन्धान तथा कानुनी कारबाहीका लागि इलाका प्रहरी कार्यालय बर्दिबास, महोत्तरीमा बुझाइएको प्रहरीले जनाएको छ।
प्रहरीले घटनास्थलबाट ४५४ किलोग्राम गाँजा, मिनी ट्रक, सवारी चालक अनुमति पत्र, सवारी दर्ता किताब तथा एक थान मोबाइल समेत बरामद गरेको छ।
