धनकुटामा ८ सय ४ केजी गाँजा सहित दुई जना पक्राउ
धनकुटा, साउन १६ । धनकुटाको चौबिसे गाउँपालिकाबाट प्रहरीले ठूलो परिमाणमा प्रतिबन्धित लागूऔषध गाँजा बरामद गरेको छ। घटनामा संलग्न रहेको आरोपमा दुई जनालाई नियन्त्रणमा लिएर थप अनुसन्धान अघि बढाइएको प्रहरीले जनाएको छ।
जिल्ला प्रहरी कार्यालय धनकुटाका अनुसार शनिबार दिउँसो करिब १ बजे चौबिसे गाउँपालिका–४ स्थित जनता आवासका लागि निर्माण गरिएको खाली घरमा अवैध रूपमा गाँजा सञ्चय गरिएको भन्ने गोप्य सूचनाका आधारमा प्रहरी उपरीक्षकको नेतृत्वमा खटिएको टोलीले खानतलासी गरेको थियो।
खानतलासीका क्रममा उक्त घरबाट प्लास्टिकका ४८ वटा बोरामा राखिएको ८०४ किलोग्राम प्रतिबन्धित लागूऔषध गाँजा फेला परेपछि प्रहरीले बरामद गरेको हो।
घटनामा संलग्न रहेको आरोपमा छथर जोरपाटी गाउँपालिका–४ घर भई चौबिसे गाउँपालिका–४ मा होटल सञ्चालन गर्दै आएका ४० वर्षीय हरि प्रसाद ओझा र चौबिसे गाउँपालिका–४ निवासी ३४ वर्षीय आशिष विश्वकर्मालाई प्रहरीले नियन्त्रणमा लिएको छ।
बरामद गाँजा र पक्राउ परेका दुवै जनामाथि लागूऔषध सम्बन्धी कसुरमा आवश्यक अनुसन्धान भइरहेको जिल्ला प्रहरीले जनाएको छ।
