मोरङको कानेपोखरीमा लागूऔषध सहित दुई जना पक्राउ
मोरङ । मोरङको कानेपोखरी गाउँपालिका–२ थानटोलबाट प्रहरीले लागूऔषधसहित दुई जनालाई पक्राउ गरेको छ। पक्राउ पर्नेमा कानेपोखरी–२ थानटोलका ३५ वर्षीय ‘डन’ भनिने रेवत कार्की र कानेपोखरी–३ का २६ वर्षीय सुजन ऋषिदेव रहेका छन्।
विशेष सूचनाका आधारमा प्रहरी चौकीबाट प्रहरी नायब निरीक्षक (प्र.ना.नि.) सदानन्दकुमार यादवको कमाण्डमा खटिएको टोलीले उनीहरूलाई पक्राउ गरेको हो।
प्रहरीले कार्कीको कोठामा रहेको काठको बाकसमा लुकाइराखेको अवस्थामा कालो प्लास्टिकका विभिन्न पोकामा रहेको शंकास्पद पदार्थ बरामद गरेको जनाएको छ। बरामद पदार्थ चारवटा ठूला र सातवटा साना पोकामा रहेको तथा करिब १० ग्राम रहेको अनुमान गरिएको छ।
त्यस्तै, उनीहरूको साथबाट नगद ६३ हजार ४८५ रुपैयाँ, चाँदीजस्तो देखिने सेतो धातुका बाला २ थान, औँठी २ थान, कानमा लगाउने टप ४ थान, अन्य धातुका टुक्रा ९ थान तथा सुनजस्तो देखिने पहेँलो धातुको सिक्री १ थान बरामद भएको प्रहरीले जनाएको छ।
पक्राउ परेका दुवै जनालाई बरामद सामानसहित आवश्यक अनुसन्धान तथा कानुनी कारबाहीका लागि सम्बन्धित निकायमा पठाइएको छ। बरामद शंकास्पद पदार्थको परीक्षण तथा घटनाबारे थप अनुसन्धान भइरहेको प्रहरीले जनाएको छ।
