धनकुटाका यी क्षेत्रमा भोलि शनिबार १० घण्टा विद्युत् सेवा अवरुद्ध हुने
धनकुटा,५ भदौ । धनकुटामा ११ केभी बेल्हारा फिडरअन्तर्गत विद्युत् लाइन मर्मत तथा झाडी कटान कार्य गरिने भएकाले शनिबार विभिन्न क्षेत्रमा विद्युत् सेवा अवरुद्ध हुने भएको छ।
नेपाल विद्युत् प्राधिकरण धनकुटा वितरण केन्द्रका अनुसार भोलि भदौ ६ गते शनिबार बिहान ७ बजेदेखि साँझ ५ बजेसम्म धनकुटा सबस्टेसनदेखि बेल्हारा हुँदै सहिदभूमि गाउँपालिकातर्फ जाने ११ केभी लाइन आसपासका रुखका हाँगा, बाँस तथा झाडी कटान (बुस कटिङ) गरिनेछ।
त्यसैगरी डिक्स, पिन परिवर्तन तथा जम्पर टाइट गर्ने कार्यसमेत हुने भएकाले उक्त अवधिमा गोठगाउँ, पात्लेखोला, गुठीटार, बेल्हारा, बेल्हारा बेँसी तथा सहिदभूमि गाउँपालिकाका सम्पूर्ण क्षेत्रमा विद्युत् सेवा अवरुद्ध हुने प्राधिकरणले जनाएको छ।
निर्धारित समयअघि नै काम सम्पन्न भएमा सोहीअनुसार विद्युत् सेवा पुनः सञ्चालन गरिनेछ। सेवा अवरुद्ध हुँदा ग्राहकमा पर्न जाने असुविधाप्रति नेपाल विद्युत् प्राधिकरण धनकुटा वितरण केन्द्रले क्षमायाचना गरेको छ।
