सामुदायिक वनबाट बेवारिसे अवस्थामा ११ थान भरुवा बन्दुक बरामद
दाङ । दाङका विभिन्न स्थानमा प्रहरीले बेवारिसे अवस्थामा ११ थान एकनाले भरुवा बन्दुक बरामद गरेको छ।
विशेष सूचनाका आधारमा जिल्ला प्रहरी कार्यालय दाङ मातहतका विभिन्न प्रहरी युनिटबाट खटिएको प्रहरी टोलीले २०८३ भदौ २५ गते बिहान ६ बजेदेखि १० बजेसम्म जिल्लाका विभिन्न स्थानमा खोजतलास गरेको थियो। सो क्रममा बेवारिसे अवस्थामा रहेका ११ थान एकनाले भरुवा बन्दुक फेला पारी बरामद गरिएको प्रहरीले जनाएको छ।
प्रहरीका अनुसार घोराही उपमहानगरपालिका–१ शिरुखर्कस्थित राष्ट्रिय वनबाट ६ थान, बंगलाचुली गाउँपालिका–८ कएना पानीस्थित सामुदायिक वनबाट २ थान र लमही नगरपालिका–७ स्थित नवशान्ती सामुदायिक वनबाट ३ थान भरुवा बन्दुक बरामद गरिएको हो।
बरामद गरिएका सबै बन्दुक जिल्ला प्रहरी कार्यालय दाङमा ल्याइएको छ। घटनाका सम्बन्धमा थप अनुसन्धान भइरहेको प्रहरीले जनाएको छ।
