धान खेतमा बिछ्याइएको खुला तारमा करेन्ट लागेर सीतामढीमा तीनको मृत्यु, दुईजना घाइते
रौतहट, १७ असोज । धान खेतमा बिछ्याइएको खुला विद्युतीय तार स्थानीयका लागि मृत्युको पासो बनेपछि भारतको बिहारस्थित सीतामढीमा एकै घटनामा तीन जनाको ज्यान गएको छ।
रौतहटको सदरमुकाम गौरसँग सीमा जोडिएको बैरगनिया प्रखण्डअन्तर्गत अख्ता पश्चिमी चकवा पञ्चायत–५ को तकिया टोलमा शनिबार बिहान भएको दुर्घटनामा तीन जनाको घटनास्थलमै मृत्यु भएको हो। करेन्ट लागेर अन्य दुई–तीन जना घाइते भएका छन्। घाइतेहरूको स्थानीय अस्पतालमा उपचार भइरहेको जनाइएको छ।
स्थानीयका अनुसार बिहानै हराएको भैंसी खोज्न केही ग्रामीण धान खेततर्फ गएका थिए। उज्यालो नहुँदै खेतमा पुगेका उनीहरूले त्यहाँ बिछ्याइएको खुला विद्युतीय तार देख्न सकेनन्। तारको सम्पर्कमा पुगेलगत्तै उनीहरूलाई करेन्ट लागेको थियो।
घटनामा तीन जनाको मृत्यु भएपछि उनीहरूसँगै रहेका अन्य व्यक्तिसमेत करेन्टको चपेटामा परेका थिए। भारतीय सञ्चारमाध्यमहरूले स्थानीय स्रोतलाई उद्धृत गर्दै घटनामा दुई–तीन जना घाइते भएको जनाएका छन्।
घटनास्थलमै दुई वटा जंगली बँदेलसमेत मृत भेटिएका छन्। धानबालीमा जंगली जनावर पस्न नदिन खेतधनीले खुला रूपमा विद्युतीय तार बिछ्याएको हुनसक्ने प्रारम्भिक आशंका गरिएको छ। यद्यपि तार कसले र कुन प्रयोजनका लागि बिछ्याएको भन्ने विषयमा आधिकारिक पुष्टि हुन बाँकी छ।
बिहानको समयमा खेतमा मानिसको आवतजावत हुने जानकारी हुँदाहुँदै खुला विद्युतीय तार प्रयोग गरिएको भए त्यसले गम्भीर सुरक्षा जोखिम निम्त्याएको देखिन्छ। घटनापछि तकिया टोलमा शोक छाएको छ भने मृतकका परिवारजनमा बज्रपात भएको छ।
घटनाको जानकारी पाएपछि स्थानीय प्रहरी तथा प्रशासन घटनास्थल पुगेका छन्। दुर्घटनाको कारण, विद्युतीय तार बिछ्याउने व्यक्ति तथा घटनासँग सम्बन्धित अन्य विषयमा अनुसन्धान भइरहेको जनाइएको छ।
