सुनकोसीमा सुमो खस्दा खोटाङका युपना, काब्या र स्वस्तिकाको मृत्यु
खोटाङ । काठमाडौंबाट खोटाङ आउँदै गरेको सुमो सिन्धुलीको सुनकोसी नदीमा खस्दा खोटाङका तीन युवतीको मृत्यु भएको छ भने चार जना घाइते भएका छन्। दुर्घटनामा तीन जना अझै बेपत्ता रहेको जनाइएको छ।
मृत्यु हुनेमा दिक्तेल रूपाकोट मझुवागढी नगरपालिका–५, लफ्याङ, दुभेका २१ वर्षीया युपना राई र १९ वर्षीया काब्या राई रहेका छन्। त्यस्तै, खोटेहाङ गाउँपालिका–६, इन्द्रेणीपोखरी घर भई दिक्तेलमा बस्दै आएकी १६ वर्षीया स्वस्तिका विश्वकर्माको पनि दुर्घटनामा मृत्यु भएको छ।
को १ ज २९७६ नम्बरको सुमो सिन्धुलीको फिक्कल गाउँपालिका–६, नागथानस्थित मध्यपहाडी लोकमार्गबाट सुनकोसी नदीमा खसेको थियो।
दुर्घटनामा सुमो चालक ओखलढुङ्गाको सिद्धिचरण नगरपालिका–२ का २९ वर्षीय आशिष विश्वकर्मासहित चार जना घाइते भएका छन्।
दुर्घटनामा बेपत्ता भएका तीन जनाको खोजी भइरहेको जनाइएको छ। घटनाबारे थप विवरण आउन बाँकी छ।
