धनकुटा अस्पतालमा अब ५ वटा अपरेशन सेवा शुरु
धनकुटा खबर । नयां मेडिकल सुपरिटेन्डेन (अधिकृत) डाक्टरको आगमन संगै धनकुटा अस्पतालमा अब ५ वटा अपरेशन सेवा शुरु भएको छ ।
गएको बिहिबार अस्पतालले एक अपरेशन सहित अन्य ४ महिलाहरुको सफल प्रशुती गराएपछि अस्पतालले शुक्रबार उक्त अपरेशन सेवाहरुको बारेमा जानकारी दिएको छ ।
अस्पताल बिकास समितिका अध्यक्ष सुनिलमान ढंगोलले छथर जोरपाटी गाउँपालिका वडा नं. ४ की देवी लिम्बुले अपरेसनबाट बच्चा जन्माउन सफल भएको जानकारी दिनुभयो ।
जिल्ला अस्पतालमा नै अपरेशन हुने भएपछि अहिले धनकुटा अस्पतालका सुत्केरी वाड समेत भरिभराउ रहेको छ ।
जिल्ला मा नै अपरेशन हुने भएपछि हजारौ रुपैया बचत हुनको साथै बिभिन्न कठिनाईहरुबाट मुक्त भएको सेवाग्राही हरुले बताएका छन् ।
धनकुटा अस्पतालमा अब हर्निया, हाईड्रोसिल, ट्युमर, एपेन्डिसाईट, गोलीगाठ्ठा लगायतको अपरेसन हुनेछ ।
अपरेसनको लागि जिल्ला अस्पतालमा स्वास्थ्यकर्मीको टिम निर्माण गर्ने कार्य भएको डाक्टर फडिन्द्र बरालले जानकारी दिनुभयो ।
धनकुटा अस्पतालमा संचालन भएको यो सेवाले धनकुटा, भोजपुर, तेह्रथुम र संखुवासभाका विरामीलाई सेवा पुग्नेछ ।
एक मेडिकल सुपरिटेन्डेन र दुई एम बि.बि.एस.डाक्टरहरुको दरबन्दी भएको धनकुटा अस्पतालमा मेडिकल सुपरिटेन्डेन आएपछि बेला–बेलामा अपरेशन सेवा सुचारु हुने गरेको छ ।
