मोर्चालाई शंकर पोखरेलको चुनौति- जनता साथमा छन् भने चुनावमा जान किन डराएको ?
‘जननिर्वाचित प्रतिनिधिमार्फत संविधान संशोधन गर’
काठमाडौं, १० फागुन । प्रमुख प्रतिपक्षी दल नेकपा एमालेका स्थायी समिति सदस्य शंकर पोखरेलले निर्वाचनमा होमिन मधेसवादी दललाई आह्वान गरेका छन् ।
सरकारले चुनाव घोषणा गरेसँगै मोर्चा आन्दोलनमा उत्रिएपछि नेता पोखरेलले सामाजिक सञ्जालमार्फत तराई मधेसका जनता साथमा भए चुनावमा जान किन डराएको भनी प्रश्न गरेका छन् ।
उनले चुनावबाट जनताको ताजा जनादेश लिएर संविधान संशोधन गर्न मोर्चालाई सुझाव समेत दिएका छन् ।
‘मोर्चालाई तराई र मधेसका जनता आफ्ना पक्षमा छन् भन्ने विश्वास भए चुनावमा भाग लिएर जननिर्वाचित प्रतिनिधिमार्फत संविधान संशोधनको माग गर्नु राम्रो हो,’ नेता पोखरेलले भनेका छन् ।
