पार्टी नेतृत्व सबै नेता तथा कार्यकर्तालाई उचित पुरस्कार दिने भन्दै प्रधानमन्त्री बनेलगत्तै देउवाले दिए यस्तो निर्देशन
काठमाडौँ, प्रधानमन्त्री शेरबहादुर देउवाले पार्टीका नेता तथा कार्यकर्तालाई राजधानीमा नबस्न र नेतृत्वको चाकरीमा नरमाउन कडा निर्देशन दिएका छन् । उनले पार्टी नेतृत्वले सबै नेता तथा कार्यकर्ताको उचित पुरस्कार दिने भन्दै स्थानीय तहको दोस्रो चरणको निर्वाचनमा सहभागी हुन र पार्टीलाई जिताउन कडा निर्देशन दिएका छन् ।
दोस्रो चरणको निर्वाचनपछि मात्रै मन्त्रिपरिषद विस्तार गरिने बताउँदै आफ्नो पार्टीका नेता कार्यकर्तालाई काठमाडौंमा भिडभाड नगरी गाउँतिर फर्कन आग्रह गरेका छन् । मन्त्री पदका लागि दर्जनौं सांसदहरुले देउवासम्म पुग्न पहुँच प्रयोग गरिरहेको बेला देउवाको कडा निर्देशन आएको हो ।
उनले अब दोस्रो चरणको चुनावपछि मात्र मन्त्रिपरिषद विस्तार हुने भन्दै सांसदहरुलाई काठमाडौंमा भिडभाड नगरी चुनावमा खट्न निर्देशन दिएका छन् ।
पार्टी भित्र प्रतिस्पर्धी देखिएका रामचन्द्र पौडेल समूहलाई समेत अनावश्यक बार्गेनिङ नगर्न देउवाले निर्देशन दिएका हुन् । पार्टी केन्द्रीय कार्यालय सानेपामा आज बसेको केन्द्रीय कार्य समितिको बैठकमा सदा भन्दा देउवा कडा रुपमा प्रस्तुत भएका हुन् ।
