‘प्रधानमन्त्री छोडेर माओवादीलाई जिताउन म मैदानमा आएँ’ : प्रचण्ड
सोलुखुम्बु, २६ जेठ । माओवादी केन्द्रका अध्यक्ष पुष्पकमल दाहालले दोस्रो चरणको निर्वाचनमा चुनाव जिताउनका लागि आफू मैदानमा आएको बताए ।
सोलुखुम्बुको सोताङमा शुक्रबार चुनावी सभालाई सम्बोधन गर्दै प्रचण्डले पहिलो चरणमा तेस्रो पार्टीको रुपमा देखिएको र त्यसमा आफू प्रधानमन्त्री भएकोले कुनै तयारी गर्न नभ्याएको बताए । ‘मैले त हाम्रो पार्टीले कति ठाउँमा जित्यो भन्ने नै थाहा पाएको थिइनँ । प्रधानमन्त्री छोडेर बुझ्दाखेरी ४६ ठाउँमा प्रमुख र ५२ ठाउँमा दोस्रो भएका रहेछौँ’ उनले भने, ‘त्यतिखेर म प्रधानमन्त्री रहेकोले आवश्यक तयारीमा हिँड्न पाएको थिइनँ । अब म प्रधानमन्त्री छोडेर मैदानमा आइसकेँ । अब हाम्रो जित सुनिश्चित छ ।
’
अध्यक्ष दाहालले स्थानीय तहमा जुनसुकै नम्बरमा आफ्नो पार्टी परे पनि प्रदेश र केन्द्रको चुनावमा माओवादी एक नम्बरको पार्टी हुने र बनाउनैपर्ने बताए । ‘जबसम्म माओवादी एक नम्बरको पार्टी हु्ँदैन, तबसम्म संघीय लोकतान्त्रिक गणतन्त्र स्थापित हुँदैन’ उनले भने । उनले स्थानीय तहको चुनाव एमाले र कांग्रेसले नचाहेको बताए । उनीहरुले पुरानै संरचनामा चुनाव गराउन चाहेको बताए । तर आफूले ‘स्थानीय तहमा कुनै बेला माओवादीले, कुनै बेला एमाले र कांग्रेसले जित्ला, हार्ला तर सिस्टम बसोस्, देशले जितोस्’ भनेर चुनावको वातावरण मिलाएको दाहालको दाबी थियो ।
