एमालेले नै धोका दिएर यी ठाउँबाट एमालेलाई नराम्रोसँग हराए !
काठमाडौं । पहिलो चरणको स्थानीय तहको निर्वाचनमा आफ्नै पार्टीबाट हराइएको भन्दै नेकपा एमालेमा गुनासो बढेको छ । प्रदेश नम्बर ३ को कमिटीले चुनावी रिपोर्ट नै मगाएको छ । एमाले महासचिव ईश्वर पोखरेलले कतिपय स्थानीय तहमा एमालेले एमालेलाई भोट नदिएर थोरै मतले धेरै नेताहरु पराजित भएको भन्दै चुनावको बेला धोखा दिनेहरु एमालेलाई नचाहिने बताए । उनले भने, ‘आफ्नै पार्टीका साथीहरुले हराएका उजुरी परेका छन् । चुनावको बेला एमाले नहुनेहरु कहिल्यै चाहिँदैन, उनीहरुको पहिचान हुँदैछ र दण्डित हुनेछन् ।’
रसुवा, मकवानपुर, धादिङ, काभ्रे, सिन्धुली लगायतका कतिपय जिल्लाका स्थानीय तहमा एमालेभित्रकै अन्तर्घातले गर्दा उपप्रमुख जितेर प्रमुख हारिएको रिपोर्ट पेश भएको एमाले स्रोतले जनाएको छ । धेरै वडामा अन्तर्घातकै कारण चुनाव हारिएको रिपोर्ट प्रदेश कमिटीमा प्राप्त भएको छ ।
रसुवामा ५ वटै स्थानीय तहका उपप्रमुख एमालेले जित्दा प्रमुख भने २ जना मात्र जितेका छन् । मकवानपुरमा पनि २ स्थानीय तहमा अन्तर्घातका कारण प्रमुख हारिएको र सिन्धुलीको तीनपाटन तथा धादिङको ज्वालामुखी गाउँपालिकामा पनि एमालेले एमाले हराएको रिपोर्ट पेश भएको छ । ललितपुरमा पनि अन्तर्घात भएको एमालेलेको निष्कर्ष छ ।
३ नम्बर प्रदेशका ११९ स्थानीय तहमध्ये एक महानगर, एक उपमहानगरसहित ६४ स्थानमा प्रमुख जितेर एमालेले बहुमत हासिल गरेको छ । भरतपुर महानगरमा मतपत्र च्यातिएका कारण गणना स्थगित भएको छ ।
एमालेको प्रदेश नम्बर ३ कमिटीले सबै जिल्लाबाट चुनावी रिपोर्ट मगाएको छ । जितेको र हारेको ठाउँका बस्तुगत कारण मागेर समिक्षा गर्न लागिएको पोलिटव्यूरो सदस्य अरुण नेपालले बताए । – अनलाइन खबरबाट
