२ नं प्रदेश मा कांग्रेसले १०० सिट जिते एमालेले १०१ सित जित्छ : शंकर पोखरेल
काठमाडौं, ७ साउन । नेपाली कांग्रेसका नेता विमलेन्द्र निधिले प्रदेश नम्वर २ बाट कांग्रेसले १०० सिट जित्ने दावी गरिरहेका बेला अर्काे सत्तासाभेदार दल नेकपा माओवादी केन्द्रले ४० सिट जित्ने दावी गरेको छ । त्यसैगरी प्रमुख प्रतिपक्ष दल एमालेले ५३ प्रतिसत अर्थात ६८ सिट जितेर पहिलो हुने दावी गरिरहेका बेला मधेस केन्द्रीत दलहरुले पनि पहिलो हुने दावी गरिरहेका छन् ।
दलहरुले दावी गरेजस्तै परिणाम ल्याउन प्रदेश नम्वर २ मा २८६ स्थानीय तहको आवश्यक पर्छ । तर प्रदेश नम्वर २ मा १२७ स्थानीय तह मात्र छन् । नेपाली कांग्रेसले राजधानीमा आयोजिना गरेको प्रदेश नम्वर २ को भेलामा नेता निधिले १०० सिट जित्ने दावी पेश गरे । उनको दावीलाई नेपाली कांग्रेसभित्रकै मधेसी नेताहरु स्वीकार गर्न सक्दैनन् । मधेसमा एमाले वा नेपाली कांग्रेस मध्ये एउटा दल झिनो अन्तरबाट पहिलो हुने दावी नेपाली कांग्रेसकै मधेसी नेताहरुको रहेको छ ।
पहिलो र दोस्रो निर्वाचनमा पहिलो भएको एमालेले प्रदेश नम्वर २ मा पनि पहिलो हुने दावी गरेको छ । ‘विमलेन्द्र निधिजीको तर्क अपत्यारिलो मात्र हैन हास्यास्पद छ’, एमाले स्थायी कमिटी सदस्य शंकर पोखरेलले भने ‘देशभर ८५ स्थान जित्न नसक्ने माओवादी केन्द्रले प्रदेश नम्वर २ मा ४० सिट जित्छौ भन्नु र कांग्रेसले १२७ मा १०० सिट जित्छौ भन्नु उस्ता उस्तै हो ।’
पोखरेलले निधि र माओवादी केन्द्रप्रति ब्यडगे गर्दै भने ‘कांग्रेसले १०० सिट जिते हामी १०१ सिट जित्छौ, मधेस केन्द्रीत दलहरु त अझै प्रदेश नम्वर २ सवै हाम्रो हो भनेर दावी गरिरहनु भएको छ, चुनावपछि नतिजा हेरौला एमाले पहिलो हुन्छ ।’
एमालेले प्रदेश नम्वर २ को निर्वाचनलाई लक्षित गरी हाइकमाण्ड चुनावी परिचालन गरिसकेको छ । एमाले नेताहरु गाउँ पसिसकेका छन् भने कांग्रेस र माओवादी केन्द्र राजधानीमा बैठक गरिरहेका छन् । – एस काठमाडौंबाट ।
