तराई डुब्नुमा भारत होइन नेपाल दोषी हो : हृदयेश त्रिपाठी
काठमाडौं, तराई मधेसका बस्ती डुबानमा पर्नुमा भारत जिम्मेवार रहेको विभिन्न दलका नेताहरुले आरोप लगाएका छन् । भारतले सीमावर्ती क्षेत्रमा तटबन्ध बाँधेको र भारी वर्षा हुँदा पनि ती बाँधहरुलाई समयमा नखोलिदिँदा नेपाली भूभाग डुबानमा परी जनधनको क्षति हुन पुगेको नेताहरुको भनाई छ ।
राजधानीमा सोमबार आयोजित भारतीय राजदूत मञ्जिभ सिंह पुरी सहभागि कार्यक्रमा नेताहरुले सीमा क्षेत्रमा देखिएको समस्या समाधान गर्न गम्भीर बन्न भारतसँग आग्रह गरे ।
एमाले नेता भीम रावलले अहिले तराईबासी नेतालीले भोग्नु परेको बाढीको समस्या भारतको कारण उत्पन्न भएको भन्दै सीमा क्षेत्रमा बाँधिएका तटबन्ध हटाइनुपर्ने बताए । उनले १९५० मा भएका सन्धीसम्झौता पुनरावलोकन हुनुपर्नेमा पनि जोड दिए ।
यस्तै कांग्रेस नेता तथा पूर्वपरराष्ट्रमन्त्री प्रकाश शरण महतले अहिले देखिएका समस्यालाई नेपाल भारतबीच छलफलबाट हल गरिनुपर्ने बताए । उनले तटबन्ध बाँधिएकै कारण डुबानको समस्या उत्पन्न हुनु र कयौंको ज्यान जानु दुखद भएको समस्याको छिटोभन्दा छिटो समाधान खोजिनुपर्नेमा जोड दिए ।
राजपा नेता हृदयेश त्रिपाठीले भने समस्या निम्तनुमा भारतको मात्रै नभएर नेपालीको पनि दोष रहेको बताए । उनले मधेसको समस्या समाधान गर्न सरकार गम्भीर नभएको समेत सो क्रममा गुनासो गरे। भारतीय राजदूत पुरीले भने तराईमा देखिएको डुबानको समस्याबारे खुलेर बोल्न चाहेनन् । बरु उनले नेपाल भारतबीचको सम्बन्ध विशेष खालको रहेको भन्दै नेपालीको पीडामा भारत सदैव सहयोग गर्न तयार रहेको बताए । – रातोपाटीबाट
