ओलीले भने,- नागरिकलाई झुक्याएर राजनीति गर्नुको अर्थ छैन
बारा, भदौ ३० । नेकपा एमालेका अध्यक्ष केपी शर्मा ओलीले स्थानीय तहमा नागरिकका लागि काम गर्ने नेतृत्वको आवश्यकता रहेको बताउनुभएको छ ।
बाराको जितपुर–सिमरा उपमहानगरपालिकामा शुक्रबार आयोजित आमसभालाई सम्बोधन गर्दै ओलीले जनताको लागि काम गर्ने नेतृत्व स्थानीय तहमा पुग्नुपर्ने र त्यस्ता व्यक्ति एमालेमा मात्रै रहेको दाबी गर्नुभयो । ओलीले असोज २ को चुनावमा एमालेको पक्षमा मतदान गरेर आफ्नो नगर र गाउँँलाई समृद्ध बनाउने अभियानमा सहभागी हुन मतदातालाई आग्रह गर्नुभयो ।
एमालेलाई मधेश विरोधी भनेर प्रचार गर्नेले मधेशका लागि केही पनि काम नगरेको भन्दै ओलीले भ्रमको खेती गरेर राजनीति गर्नुको कुनै अर्थ नरहेको बताउनुभयो । नागरिकलाई झुक्याएर राजनीति गर्ने पक्षमा एमाले नरहेको भन्दै ओलीले काम गरेर नागरिकलाई खुशी राख्नेतर्फ एमाले केन्द्रित हुने जिकिर गर्नुृभयो ।
एमाले सामाजिक सद्भावको पक्षमा रहेको भन्दै नेता ओलीले आफ्नो पार्टीले कसैप्रति विभेद गर्ने नभई सबैलाई समान व्यवहार गर्ने बताउनुभयो । एमालेको नीति राष्ट्रिय एकताको पक्षमा रहेको ओलीको भनाई थियो ।
