धनकुटामा जारी अनिश्चितकालिन आमहड्ताल स्थगित
७ दिन भित्र वार्तामा नबोलाए १५ गतेदेखि पुनः अनिश्चितकालिन आमहड्ताल गरिने
धनकुटा खबर । धनकुटामा जारी अनिश्चितकालिन आमहड्ताल सोमबार साँझबाट स्थगित गरिएको छ ।
प्रशासनले सदरमुकाम धनकुटा बजारमा लगाएको निषेधाज्ञा हटाए सगै आज बसेको आन्दोलन परिचालन समितिको बैठकले आमहड्ताल फिर्ता लिने निर्णय गरेको हो ।
सरकारले १ नम्बर प्रदेशको अस्थायी मुकाम बिराटनगर तोकेको बिरोधमा धनकुटाबासीले आन्दोलनलाई चर्काउँदै आमहड्ताल आवहन गरेका थिए ।
आज बसेको बैठकले आमहड्ताल फिर्ता लिएर आन्दोलनको स्वरुप परिवर्तन गर्ने निर्णय गरेको आन्दोलन परिचालन समिति संयोजक सुन्दरवावु श्रेष्ठले जानकारी दिनुभयो ।
बैठकले मंगलबारबाट १२ देखि १ बजेसम्म १ घण्टा चक्काजाम गर्ने तथा ७ दिनसम्म एक घण्टे चक्काजाम जारी रहने निर्णय गरेको छ । आन्दोलन परिचालन समितिले सरकारलाई ७ दिन भित्र बार्ता बोलाएर माग संबोधन गर्न अल्टिमेटम समेत दिएको छ ।
सात दिनको अवधिमा पनि वार्ता नबोलाए १५ गतेबाट पुनः अनिश्चितकालिन आमहड्ताल आवहान गरिने आन्दोलन परिचालन समितिका संयोजक श्रेष्ठले जानकारी दिनुभयो ।
