अध्यक्षले अगाडि बढ्नुस् भनेपछि अघि सरेकी हुँ, तर गुटबन्दीको शिकार भएँ : अष्टलक्ष्मी शाक्य
काठमाडौं, एमाले उपाध्यक्ष अष्टलक्ष्मी शाक्य ‘इमान’को राजनीति गर्ने नेताको सूचीमा पर्छिन् । आम नेताहरु पदकालागी प्राण फ्याँकेर लागिरहेकावेला ‘अरुलाई पनि पालो दिनुपर्छ’ भन्दै मन्त्री पद अस्वीकार गरेको इतिहास पनि लेखेकीछन् शाक्यले । यस पटक उनी प्रदेश नम्बर ३ को मूख्यमन्त्री हुने प्रवल संभावना थियो । तर, एमाले प्रदेश नम्बर ३ को संसदीय दलको नेतामा पराजित भएपछि त्यो संभावनाको ढोका पनि बन्द भएको छ ।
सात प्रदेशमध्ये प्रदेश नं ३ वाट एकजना महिला मूख्यमन्त्री बन्ने संभावनालाई पार्टीको गुटबन्दीका कारण तुहाइयो भनेर धेरैको प्रतिक्रिया आइरहेकोछ । नेतृ शाक्यले समेत कडा प्रतिक्रिया दिएकिछिन् । प्रस्तुत छ, यसै सन्दर्भमा विशेष संवाददाताले उनै नेतृ शाक्यसँग गरेको ५ प्रश्न –
१. संसदीय दलको नेता हारेपछि प्रतिक्रिया चर्को आयो भन्ने छ नि ?
– मैले वास्तविकता भनेको हुँ । मूल्य मान्यताको राजनीति गर्नुपर्छ भन्ने मेरो आशय हो । कुनै ब्यक्तिप्रति मेरो आग्रह वा पूर्वाग्रह छैन ।
२. मत कम हुँदा हुँदै किन उम्मेदवार हुनुभयो ?
– मुख्यमन्त्री हुन मैलेभन्दा पनि पार्टीले नै प्रस्ताव गरेको हो । त्यसैले म प्रतिनिधिसभामा नउठी प्रदेशसभामा आएँ । मुख्यमन्त्रीमा चुनाव लड्दै गर्दा पनि अध्यक्षले अगाडि बढ्नुस् भनेपछि अघि सरेकी हुँ । तर गुटबन्दीको शिकार भएँ । गुटबन्दी यो हदसम्म होला भन्ने सोचेकी थिइनँ ।
३. नयाँ मुख्यमन्त्रीलाई कसरी सहयोग गर्नुहुन्छ ?
– नेतृत्वको हिसावले सहयोग हुन्छ । तर, सिनियर नेतालाई जुनियर नेताको मुनी राख्न गाहे हुन्छ । उपाध्यक्षले नेतृत्व गरिसकेपछि सबैलाई मिलाउन पनि सहज हुन्थ्यो । त्यसबाट पार्टी चुकेको छ । उहाँले मागेको सहयोग हुन्छ ।
४. स्थायी कमिटीमा तपाईंहरुले नै किन सहमति गर्न सक्नुभएन त ?
– स्थायी कमिटीमा छलफल गरेर टुंगिने विषय थिएन । त्यसैले शीर्ष नेतालाई जिम्मा दिइयो । उहाँहरुले पनि मिलाउन सक्नुभएन ।
५. अब के गर्नुहुन्छ ?
– पार्टीले दिएको जिम्मेवारी इमान्दारितापूर्वक पूरा गर्छु । प्रदेश सांसदको भूमिका निर्वाह गर्छु ।
