चुलाचुली खुल्ला नकआऊट फुटबलमा धनकुटाको देउराली क्लव विजयी
धनकुटा खबर, मंसिर ९ । बाला चर्तुदशी मेलाको अवसरमा धनकुटाको छथरजोरपाटी गाउँपालिका चुलाचुली खेल मैदानमा सञ्चालन भएको खुल्ला नकआउट पुरुष फुटबल प्रतियोगिता को जीत धनकुटा नगरपालिका ७ देउराली यूवा क्लवले हाँसिल गरेको छ ।
प्रतियोगिताको फाईनलमा आज बुढा सुब्बा यूवा क्लब छथरजोरपाटी १ सँग भीडेको देउराली ३ को विरुद्ध ४ गोल लगाउदै जीत हाँसिल गरेको हो । जीत सँगै उस्ले नगद रु ३० हजार सहित ट्रफी,मेडल र प्रमाणपत्र पुरस्कार प्राप्त गरेको छ ।
दोश्रो स्थानमा चित्त वुझाएको बुढा सुब्बा यूवा क्लब छथरजोरपाटीले नगद रु २० हजार सहित ट्रफी मेडल तथा प्रमाणपत्र पाएको चुलाचुली यूवा क्लबका अध्यक्ष पदम श्रेष्ठले जानकारी दिनुभयो । चुलाचुली यूवा क्लब छथरजोरपाटी गाउँपालिका ३ र ५ को संयूक्त आयोजनामा सञ्चालित फुटबल प्रतियोगिता समापन भएको छ ।
प्रतियोगिता समापन चुलाचुली यूवा क्लबका अध्यक्ष पदम श्रेष्ठको अध्यक्षता तथा छथर जोरपाटी गाउँपालिका प्रमुख शेर बहादुर लिम्बु को प्रमुख आतिथ्यमा भएको थियो । कार्यक्रमलाई सम्वोधन गर्दै गाउँपालिका प्रमुख लिम्वुले गाउँपालिकाले आर्थिक वर्ष २०७६/७७ बाट एक वडा एक खेलमैदान निर्माणको योजना ल्याइसकेको जानकारी गराउनुभयो ।
उहाँले गाउँपालिका स्तरीय खेल मैदान सिधुवा बजारमा निर्माण गरिने समेत जानकारी गराउनु भयो । गाउँपालकिाको प्रत्येक वडामा एक खेल मैदान अभियान मार्फत गाउँपालिका भित्र रहेका खेलाडिहरु र खेलकुद क्षेत्रमा अगाडि बढाउने लक्ष रहेको बताउनु भयो ।
