स्किल क्याम्पसद्वारा इटहरीका पत्रकारलाई सहयोग
इटहरी । इटहरीस्थित स्किल क्याम्पसले इटहरीका पत्रकारहरुलाई स्वास्थ्य तथा अन्य आवश्यक सामाग्री वितरण गरेको छ ।
पत्रकार महासंघ सुनसरीको समन्वयमा इटहरी क्षेत्रमा सक्रियतापूर्वक रिपोर्टिङ गर्ने ३५ भन्दा बढी पत्रकारहरुलाई स्वास्थ्य सामाग्री वितरण गरेको हो । सँगै पत्रकारीताको लागि आवश्यक ब्याग, मास्क, स्यानेटाइजर, डायरीलगायत सामाग्रीहरुसमेत वितरण गरेको स्किल क्याम्पसका प्रमुख पृथ्वी पराजुलीले जानकारी दिए ।
कोरोना भाइरसको संक्रमणका जोखिमबिच सक्रियतापूर्वक खट्ने पत्रकारहरुलाई सामाग्री दिइएको उनले बताए । यस्तै क्याम्पसले पत्रकार महासंघलाईसमेत मास्क, स्यानेटाइजरलगायतका सामाग्री उपलब्ध गराएको छ ।
केही दिनअघि मात्र क्याम्पसले इटहरी अस्पताललाई एक लाख रुपैया भन्दा बढी रकमको पीपीइलगायत स्वास्थ्य सामाग्री दिएको थियो ।
कार्यक्रममा बोल्दै पत्रकार महासंघ सुनसरी सचिव हिमाल दाहालले समाजको लागि जोखिमबिच काम गरिरहेका पत्रकारहरुलाई सामाजिक संस्थाले गरेको सहयोग प्रसंसनीय रहेको बताए । उनले जोखिमका बिचमा पनि सतर्कताका साथ आफ्नो भूमिका निभाउन सञ्चारकर्मीहरुलाई आग्रह गरे ।
इटहरीमा स्थापित स्किल क्याम्पसले होटल मेनेजमेन्टका कक्षाहरु सञ्चालन गरिरहेको छ । विभिन्न छोटो अवधिका तालिमहरुसँगै तीन वर्षदेखि प्लस टुसमेत सञ्चालन गरेको छ । क्याम्पसमा अध्ययन गरेका कतिपय विद्यार्थीहरु नेपाल तथा विदेशका विभिन्न स्तरीय होटलहरुमा काम गरिरहेका छन् ।
क्याम्पस सञ्चालन गरिरहेको समुहले इटहरीमा गोक्यो स्कुलसमेत सञ्चालन सुरु गरेको छ ।
