धनकुटाको त्रिशुले-लेगुवा कालोपत्रेका लागि सर्भेक्षण शुरु
नारायण कुमार राई, धनकुटा खबर । धनकुटाको जोरपाटी गाउँपालिका त्रिशुले देखि महालक्ष्मी नगरपालिकाको लेगुवा सम्म ३३ किलोमिटर बाटो कालोपत्रे गर्न प्रारम्भिक अध्ययन(फिजिबिलिटी) शुरु गरिएको छ ।
स्थानिय पूर्वाधार बिभाग ग्रामिण सडक सन्जाल सुधार आयोजना (आर.सि.आई.सी.) अन्तर्गत सम्पन्न हुने उक्त आयोजनाको गाउँपालिका र नगरपालिकाले संयुक्त रुपमा प्रारम्भिक अध्ययन शुरु गरेका हुन् ।
आयोजना शुरु गर्न महालक्ष्मी नगरपालिकाका मेयर पर्शुराम नेपाल र छथर जोरपाटी गाउँपालिकाका अध्यक्ष शेरबहादुर लिम्बू,उपाध्यक्ष भिमकला श्रेष्ठ सहितको संयुक्त टोलीले प्रभावित क्षेत्रका जनसमुदाय संग छलफल गरेको गाउँपालिका अध्यक्ष लिम्बूले जानकारी दिनुभयो ।
सरोकारवालाहरु संगको प्रारम्भिक छलफलमा सडकको सिमा रेखाङ्कन गर्ने र सडक सिमानामा रहेका निजी तथा सार्वजनिक घर टहरा हटाउने सहमति भएको अध्यक्ष लिम्बूले जानकारी दिनुभयो ।
“प्रारम्भिक अध्ययन पुरा भएपछि काम शुरु गर्नका लागि तिहार अघि बिभिगमा प्रतिवेदन पठाउने छौ ।”–लिम्बूले जानकारी दिनुभयो । प्रतिवेदन पठाएपछि सडक कालोपत्रेका लागि बिभागबाट पूर्ण सर्भेक्षणको काम शुरु हुने उहाँले जानकारी दिनुभयो ।
गाउँपालिका तर्फ १३ कि.मि. र नगर तर्फ बन्ने २० कि.मि.कालोपत्रे बाटो बाटोले गाउँपालिकाको साबिक हात्तिखर्क गाउँपालिका हाल वडा नं. १ का ६२० घरधुरी र नगरका ३ वटा वडाहरु लाभाम्बित हनेछन् ।
उक्त कालोपत्रे सडक निर्माण भएमा धनकुटा जिल्लाबाट भोजपुर जिल्ला जाने बैकल्पिक मार्ग समेत बन्ने छ ।
तस्बीर- महालक्ष्मी नगरपालिकाको जितपुर नजिकैको एक गाउँ,जुन गाउँ हुंदै लेगुवा सम्म कालोपत्रे सडक जोडिने छ ।
