छथर जोरपाटीका जेष्ठ नागरिकहरुको घर–घरमा पुगेर उपचार
नारायण कुमार राई/धनकुटा,माघ २९ ।छथर जोरपाटी गाउँपालिकाले आफ्ना पालिकामा रहेका जेष्ठ नागरिकहरुलाई उनीहरुकै घरमा गएर निःशुल्क स्वास्थ्य जाँच सेवा दिएको छ ।
स्थानिय तहको निर्वाचन संगै २०७४ सालबाट पालिकाले यो कार्यक्रम स्वास्थ्य शाखाको सहयोगले चौमासिक रुपमा सन्चालन गर्दै आईरहेको छ ।
यसै क्रममा पालिकाको स्वास्थ्य शाखाले गएको हप्ता देखि पालिकाको सबै ६ वटै वडाहरुमा ७० बर्ष माथिका जेष्ठ नागरिकहरुको स्वास्थ्य जाँच गरिरहेको छ ।
हाल सम्म ३५० भन्दा बढी जेष्ठ नागरिकहरुको स्वास्थ्य जाँच गर्ने क्रम जारी रहेको पालिकाका स्वास्थ्य शाखा प्रमुख सुन्दरमान डंगोलले जानकारी दिनुभयो ।
‘यो कार्यक्रमले स्वास्थ्य संस्थामा जान नसक्ने जेष्ठ नागरिकहरुलाई धेरै सहयोग पुगेको छ’–डंगोलले भन्नु भयो,‘यसले समयमा नै रोगको पहिचान भएर उपचारका लागि स्वास्थ्य संस्थामा रेफर गर्न सहज भएको छ’ ।
जेष्ठ नागरिकहरुलाई निःशुल्क रुपमा प्राथमिक उपचार,पेसर,सुगर जाँच र औषधी दिईदै आएको उहाँले जानकारी दिनुभयो ।
