किरात खालिङ राई भाषाको पहिलो म्युजिक भिडियो “च्यारी घ्लेप्या ख्याःल् च्योह्याम्” सार्बजनिक
धनकुटा । किरात खालिङ राई भाषामा बनेको पहिलो म्युजिक भिडियो सार्वजनिक भएको छ । ममता राई इन्टरटेन्मेन्ट युट्युब च्यानलबाट सार्वजनिक भएको याे म्युजिक भिडियो नै यस भाषामा बनेको पहिलो भएको निर्माण समितिले जनाएको छ ।
लामो समयदेखि अमेरिका बस्दै आएकी गीतकार ममता राईले लेखेको ‘च्यारी घ्लेप्या ख्याःल् च्योह्याम्’ बोलको गीतमा म्युजिक भिडियो सार्वजनिक निर्माण गरिएकाे हो । खालिङ राई भाषाका थुप्रै गीत यसअघि निर्माण भएका भए पनि आधिकारिक रुपले म्युजिक भिडियोको रुपमा निर्माण गरिएको यही नै पहिलो हो ।
सोलुखुम्बुल लगायतको स्थानमा बसोवास गर्ने खालिङ राईहरुको रैथाने जीनवशैलीलाई म्युजिक भिडियोमा देखाइएको छ । ‘हामीले म्युजिक भिडियोमा गाउँको वातावरण, रैथाने जीवशैली र खालिङ राईहरुमा रहेको सांस्कृतिक सौन्दर्यलाई देखाउने प्रयास गरेका छौं’ भिडियोका निर्देशक गीलु रातोसले भन्नुभयाे । भिडियोलाई सोलुखुम्बुको माप्य दुधकोशी गाउँपालिका–१, जुभिङमा छायांकन गरिएको छ । खालिङ राईहरुको सघन वस्ति भएकै स्थानमा छायांकन गरिएकाले पनि म्युजिक भिडियो निकै रोचक बनेको निर्माण पक्षले जनाएको छ ।
जागरणमूलक शब्द रहेको गीतले सबैलाई एकता कायम गरि अघि बढ्न आह्वान गरेको गीतकार राईले बताउनु भयाे । आफू अमेरिका रहे पनि सधैंभरि आफ्नो गाउँघर र समुदायको माया लाग्ने गरेको राई बताउँछिन् । ‘यहाँ भए पनि सधैं याद उतै (नेपाल)कै आउँछ । र आफ्नो समुदायको लागि धेरै माध्यमबाट सेवा गरौं भन्ने भावनाअन्तर्गत यो जागरमूलक गीत लेखेकी हुँ’ राईकाे भनाई छ । ‘याे गीत मार्फत आफ्नो समुदायलाई एकाकार भएर अघि बढ्न आह्वान गरेकी छु ।’ राईले यसअघि नै एकल शब्दमा ‘ममता’ नामक गीति एल्वम बजारमा ल्याइसक्नु चएकाे छ । उहाले आफूलाई सामाजिक कार्य र समाज सेवामा समेत उतिकै सक्रिय तुल्याउँदै आउनु भएकाे छ ।
यस गीतको संगीत र एरेन्ज पविधन खालिङले गर्नु भएकाे छ भने यशोदा खालिङ राई र पूर्ण राईले आवाज दिएका छन् । त्यसैगरि म्युजिक भिडियोमा सज्जन राई र सुनिता राईले अभिनय गरेका छन् । स्वस्तिका, विन्दु, निशा, बन्दना, सुमित्रा र बिनिता खालिङ राईले नृत्यकारको भूमीका निर्वाह गरेका छन् । गीलु रातोसको निर्देशनमा बनेको भिडियोलाई गंगाराम राईले छायांकन र सम्पादन गरेका हुन् ।
