तरूण दलका अध्यक्षले मागे गृहमन्त्रीको राजीनामा
काठमाडौं । तरुण दलका अध्यक्ष विद्वान गुरुङले उपप्रधान तथा गृहमन्त्री नारायणकाजी श्रेष्ठको राजीनामा माग गरेका छन् ।
४१ औ बिपी स्मृति दिवसको अवसरमा आयोजित कार्यक्रममा गुरुङले देशको अन्तर्राष्ट्रिय विमानस्थलको सुरक्षा गृहमन्त्रीको अन्तर्गतमा हुने र गृहमन्त्रीलाई थाहा नै नभईकन त्यत्रो परिणामको सुन बाहिर आउन नसक्ने कुरा बताए ।
उनले भने, ‘अन्तर्राष्ट्रिय विमानस्थलबाट एउटा सियो पनि छिर्न सक्दैन । नेपाली युवाहरू विदेशबाट आउँदै गर्दा एउटा मिठाइको पोको ल्याउन पाउँदैनन् । एउटा मोबाइल हातमा लिएर छिराउन सक्दैनौँ । विश्वले नै थाहा पाउने गरी नेपालको यती ठूलो बदनाम भएको छ डेढ सय किलो सुन एयरपोर्टबाट बाहिरिँदै गर्दा राजश्व अनुसन्धान विभागले बाटोमा पक्रँदै गर्दा विश्वले नेपालको एयरपोर्टमा कस्तो सुरक्षा छ र कति भ्रष्ट छन् भन्ने कुराले बदनाम भएको छ ।’
यस्तै गृहमन्त्री खाणलाई अदालतले दोषी नठहराईकन विभिन्न सञ्चारमाध्यमले नै दोषी ठहराउने काम भएकोले यस्ता कार्यहरू जो सुकै भएपनि रोकिनुपर्ने अध्यक्ष गुरुङले बताए ।
उनले खाणलाई गृहमन्त्री श्रेष्ठले छापामार शैलीमा पक्राउ गरेको बताए ।
उनले भने, ‘गृहमन्त्री नारायणकाजी श्रेष्ठलाई म भन्न चाहन्छु । भुटानी शरणार्थी प्रकरण हाम्रो तरुण दलका पूर्वअध्यक्ष नेपाली कांग्रेसका नेता बालकृष्ण खाणलाई विना प्रमाण छापामार शैलीमा अदालतको पुर्जीविना पक्राउ गरियो । विभिन्न मिडियामा यसरी भ्रम सिर्जना गरियो कि २०४६ सालपछिको सबैभन्दा ठूलो, सबैभन्दा ठूलो भ्रष्टाचारको कारण हो भनेर लेखाइयो, जसरी समाजमा भ्रम सिर्जना गराइयो ।’
