हेलिकप्टर दुर्घटना, चार सैनिक बेपत्ता
क्वीन्सल्याण्ड । अस्ट्रेलियाको क्वीन्सल्याण्डको तट नजिकै एक सैन्य हेलिकप्टर दुर्घटना हुँदा चार जना बेपत्ता भएका छन् । लिन्डम्यान टापूमा शुक्रबार राति अस्ट्रेलिया र अमेरिकी सेनाबीच भएको रात्रिकालीन सैन्य अभ्यासका दौरान यो दुर्घटना भएको हो ।
रक्षामन्त्री रिचार्ड मार्ल्सले तत्कालै खोजी तथा उद्धारको अभियान तत्कालै सुरु गरिएको जानकारी दिएका छन् । ‘हेलिकप्टरमा सवार चार जना सदस्य अझै फेला परेका छैनन्,’ शनिबार बिहान आयोजित पत्रकार सम्मेलनमा मार्ल्सले भने ।
उनका अनुसार एमआरएच–९० टाइपान हेलिकप्टर टापु नजिकै स्थानीय समयअनुसार राति साढे १० बजे दुर्घटनाग्रस्त बनेको थियो । हाल अस्ट्रेलिया र अमेरिकाबीच सबैभन्दा ठुला द्विपक्षीय सैन्य अभ्यास टेलिस्मान साब्रे जारी रहेको छ । दुर्घटनापछि अभ्यासलाई समेत केही समय रोक्ने निर्णय गरिएको छ । –बीबीसी
