महिला विश्वकपमा हजार गोल !
काठमाडौँ । महिला विश्वकपमा फुटबलमा जाम्बियाको खासै गतिलो इतिहास छैन । हाल अस्ट्रेलिया र न्युजिल्यान्डमा जारी नवौं संस्करण नै महिला विश्वकपमा जाम्बियाको पहिलो सहभागिता हो ।
यसअघि छनोट चरण खेले पनि जाम्बिया महिला विश्वकपमा छनोट हुन सकेको थिएन । नवौं संस्करणमा पनि जाम्बिया नकआउट चरणमा पुग्न सकेन । समूह ‘सी’ मा यो अफ्रिकी राष्ट्र तीन अंकसहित तेस्रो भयो ।
उक्त समूहबाट जापान र स्पेन नकआउट चरणमा पुगे । आफ्नो पहिलो खेलमा जापानसँग ५—० गोलले पराजित भएको जाम्बिया दोस्रो खेलमा स्पेनसँग पनि ५—० गोलले नै हार्यो ।
तर, सोमबार खेलिएको समूहगत चरणको तेस्रो खेलमा भने जाम्बियाले कोस्टारिकालाई ३—१ गोलले हरायो । महिला विश्वकपको इतिहासमा जाम्बियाको यो पहिलो जित थियो । त्यसैले जाम्बियाको घरेलु फुटबलका लागि यो ऐतिहासिक क्षण थियो ।
तर, विश्व खेलकुदमा एउटा कथन चर्चित छ, ‘इतिहास रच्नका लागि उपाधि चुम्नु आवश्यक छैन ।’ सोमबारको खेलमा जाम्बियाकी एक खेलाडीको लागि पनि यो भनाई सार्थक बन्न पुग्यो ।
जाम्बियाकी बार्बरा बान्डाले कोस्टारिकाविरुद्धको खेलको ३१ औं मिनेटमा गोल गरिन् । बार्बरा बान्डाले पेनाल्टीमार्फत गोल गरेकी थिइन् । जाम्बियन टोलीको जितमा त्यो एउटा सामान्य गोलमात्र थियो । तर, समग्र महिला विश्वकपको इतिहासमा भने त्यो निकै महत्वपूर्ण गोल थियो ।
संयोगले बार्बरा बान्डाले गरेको त्यो गोल महिला विश्वकपको इतिहासमा भएको १००० औं गोल थियो । त्यसैले महिला विश्वकपको इतिहासमा १०००औं गोल गर्ने खेलाडीको रुपमा २३ वर्षीया बार्बरा बान्डाको नाम दरिन पुगेको छ ।
उनी जाम्बियाकी कप्तान पनि हुन् । उनले पेनाल्टीमा कोस्टारिकाकी गोलरक्षक ड्यानिएला सालेरालाई छक्याउँदै उक्त गोल गरेकी थिइन् । सोही गोलका कारण महिला विश्वकपमा १०००औं गोल खाने गोलरक्षक बन्न पुगिन्, कोस्टारिकाकी सोलेरा ।
बार्बरा बान्डाले गोल गर्नासाथ विश्व फुटबल महासंघ (फिफा) ले विश्वकपको १०००औं गोल गरेको भन्दै उनलाई बधाई दिएको थियो । फिफाले सामाजिक सञ्जालमार्फत उनलाई बधाई दिएको हो ।
पेनाल्टी प्रहार गर्नुअघि नै उनलाई यो कुराको जानकारी भने थियो । ‘यो कुरा पेनाल्टी प्रहार गर्नुअघि नै मलाई थाहा थियो । त्यसैले पनि म यो अवसरलाई कुनै पनि हालतमा सदूपयोग गर्न चाहन्थें । यो मेरा लागि मात्र होइन, मेरो देशका लागि पनि महत्वपूणर् उपलब्धि हो,’ खेलपछि बार्बरा बान्डाले भनेकी छन्, ‘अब हामी महिला विश्वकपबाट एउटा महत्वपूणर् उपलब्धि लिएर स्वदेश फर्किने छौं ।’
