महिला विश्वकपको फाइनल प्रवेशका लागि इंग्ल्यान्ड र अस्ट्रेलिया भिड्ने
काठमाडौं । फिफा महिला विश्वकपको फाइनल प्रवेशका लागि इंग्ल्यान्ड र अस्ट्रेलिया भिड्ने भएका छन् ।
शनिबार भएको क्वार्टरफाइनलमा इंग्ल्यान्डले कोलम्बियालाई २–१ ले हराउँदै अन्तिम–४ मा स्थान बनायो । त्योसँगै फाइनल प्रवेशका लागि घरेलु टिम अस्ट्रेलियालाई प्रतिद्वन्द्वीका रूपमा पाएको हो ।
इंग्ल्यान्डको जितमा लौरेन हेम्प र एलेसिया रुसोले समान एक गोल गरे । कोलम्बियाकी लेइसी सान्टोसले गोल फर्काए पनि टिमको हार टार्न सकिनन् ।
खेलमा कोलम्बियाले सुरुआती बनाएको थियो । ४४औँ मिनेटमा सान्टोसले गरेको गोलबाट कोलम्बियाले अग्रता लिएको थियो । तर, यो लामो समय टिक्न सकेन ।
पहिलो हाफको इन्ज्युरी समयमा हेम्पले गोल गर्दै इंग्ल्यान्डलाई खेलमा फर्काएकी थिइन् । ६३औँ मिनेटमा रुसोले गोल गर्दै इंग्ल्यान्डलाई २–१ को अग्रता दिलाएकी थिइन् ।
इंग्ल्यान्डले आउँदो बुधबार फाइनल प्रवेशका लागि अस्ट्रेलियासँग खेल्नेछ ।
अस्ट्रेलियाले पनि शनिबारै भएको क्वार्टरफाइनलमा फ्रान्सलाई हराउँदै सेमिफाइनलको यात्रा तय गरेको हो । अस्ट्रेलियाले फ्रान्सलाई ‘सडन डेथ’मा हराउँदै सेमिफाइनलमा स्थान बनाएको थियो । खेलको निर्धारित र अतिरिक्त समय गोलरहित बराबरीमा सकिएपछि पेनाल्टीबाट निर्णय लिइएको थियो ।
योसँगै विश्वकपको सेमिफाइनल समीकरण पूरा भएको छ । बुधबारै हुने अर्को सेमिफाइनलमा स्पेनले स्वीडेनसित प्रतिस्पर्धा गर्नेछ ।
