संसद् अवरोध हटाउन राष्ट्रिय पार्टीका शीर्ष नेतासँग छलफल गर्दै प्रधानमन्त्री प्रचण्ड
काठमाडौं, ३ साउन । प्रधानमन्त्री पुष्पकमल दाहाल ‘प्रचण्ड’ ले संसद् गतिरोध अन्त्यका लागि राष्ट्रिय दलको मान्यता प्राप्त दलका नेताहरुसँग छलफल गर्ने भएका छन् ।
आज (आईतबार) १२ बजे प्रधानमन्त्रीको कार्यालय सिंहदरबारमा छलफल हुने बताइएको छ । गत मंसिर ४ मा सम्पन्न प्रतिनिधि सभा निर्वाचनबाट सात दलले राष्ट्रिय दलको मान्यता पाएका थिए ।
राष्ट्रिय दलमा नेकपा (एमाले), नेपाली कांग्रेस, नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी र जनमत पार्टी रहेका छन् । प्रधानमन्त्री प्रचण्डले यी सात दलका शीर्ष नेताहरुसँग संसद् गतिरोध अन्त्यका विषयमा छलफल गर्न लागेका हुन् ।
सुन तस्करी प्रकरणको छानविनका लागि उच्चस्तरीय समितिको माग गर्दै एमालेले तीन हप्तादेखि संसद् अवरुद्ध गरिरहेको छ । एमालेको प्रस्तावअनुसार समिति बनाउन सरकार तयार छैन । समिति बनाउँदा अहिलेसम्म भएका छानविन प्रभावित हुने सरकारले बताउँदै आएको छ ।
