सीआईबीले पूर्व प्रधानमन्त्रीद्धयसँग घरमै पुगेर लियो बयान, आजै अनुसन्धान प्रतिवेदन पेश गर्ने
काठमाडौं, ४ भदौ । ललिता निवास जग्गा प्रकरणमा नेपाल प्रहरीको केन्द्रीय अनुसन्धान व्युरो (सिआईबी)ले तत्कालीन प्रधानमन्त्रीद्धय माधवकुमार नेपाल र बाबुराम भट्टराईसँग बयान लिएको छ।
पूर्व प्रधानमन्त्री नेपाल नेतृत्वको सरकारले बालुवाटारस्थित प्रधानमन्त्री निवास विस्तार गर्न त्यहाँ रहेको जग्गा मोहीलाई सट्टा भर्नामा दिने निर्णय गरेको थियो।
सर्वोच्च अदालतले उक्त प्रकरणमा निर्णयकर्तामाथि पनि अनुसन्धान गर्न आदेश दिएपछि सिआईबीले पूर्वप्रधानमन्त्री नेपालसँग उनकै निवास कोटेश्वर पुगेर बयान लिएको हो।
साथै, पूर्व प्रधानमन्त्री डा. बाबुराम भट्टराईसँग पनि सिआईबीले बयान लिएको छ। भट्टराईको बयानका लागि सिआईबीको टोली उनको निवास टोखा पुगेको थियो।
उनीहरूको बयानपछि सीआईबीले आजै अनुसन्धान प्रतिवेदन सरकारी वकिल कार्यालयमा बुझाउने तयारी गरेको छ।
यो प्रकरणमा सीआईबीले अहिले १८ जनालाई हिरासतमा राखेर सङ्गठित किर्ते मुद्दामा अनुसन्धान गरिरहेको छ।
यसअगाडि सीआईबीले पूर्व मुख्यसचिव लीलामणि पौड्यालसँगपनि बयान लिएको थियो।
