जनयुद्ध दिवसको बिदा फिर्ता नलिए कडा कदम चाल्ने ओलीको चेतावनी
काठमाडौं, १६ असोज । प्रमुख प्रतिपक्षी दल नेकपा (एमाले) तथा पूर्व प्रधानमन्त्री केपी शर्मा ओलीले शान्ति प्रक्रिया टुँगो लगाउन पहल गर्दापनि माओवादी केन्द्रका अध्यक्ष तथा प्रधानमन्त्री पुष्पकमल दाहालले साथ नदिएको आरोप लगाएका छन् । उनले आफू प्रधानमन्त्री हुँदा टिआरसी टुँगो लगाउने खोजेको भएपनि प्रचण्डले साथ नदिएको स्मरण गराएका हुन् ।
आज (मंगलबार) बसेको प्रतिनिधिसभाको बैठकमा प्रतिपक्षी दलको नेताको रुपमा सम्बोधन गर्दै ओलीले यस्तो टिप्पणी गरेका हुन् । उनले अहिले प्रधानमन्त्री दाहालले शान्ति प्रक्रिया टुँग्याउन पहल गरे आफूले सहयोग गर्ने पनि प्रतिबद्धता जनाए ।
सो क्रममा ओलीले सरकारलाई अर्को क्याबिनेटबाट जनयुद्ध दिवसको बिदा फिर्ता लिन अल्टिमेटम दिएका छन् । ओलीले हिंसा थालेको दिन दिवस हुन नसक्ने भन्दै अर्को क्याबिनेटबाट फिर्ता नलिए आफूहरुले कदम चाल्ने चेतावनी दिएका हुन् । सम्बोधनको क्रममा ओलीले भने,‘प्रधानमन्त्रीले हिंसा सुरु गरेको दिनलाई राष्ट्रिय दिवसको रुपमा घोषणा गर्नुभयो । भोज खाउ, नाचगान गर त्यसको लागि छुट्टि भनेर बिदा घोषणा गर्नुभयो । एक वर्ष मात्रै होइन सधैंका लागि । यो बिदा घोषणा मान्य छैन ।’
