युवा संघ नेपालको अध्यक्षमा पु:न क्षितिज थेबे निर्वाचित
काठमाडौ । नेकपा एमालेको भ्रातृ सङ्गठन युवा संघ नेपालको अधिवेशनबाट अध्यक्षमा केपी ओली पक्षका क्षितिज थेबे निर्वाचित भएका छन् ।
सङ्घको नवौँ महाधिवेशनबाट अध्यक्ष बनेका थेबे पोखरामा भएको दसौँ महाधिवेशनबाट पनि अध्यक्षमा दोहोरिएका हुन् ।
थेबेले ७९६ मत पाए भने उनका प्रतिस्पर्धी सुमन पुरीले ६०८ मत पाएका थिए। पुरी आठौँ महाधिवेशनबाट सङ्घको उपाध्यक्ष बनेका थिए भने नवौँ महाधिवेशनबाट महासचिव बनेका थिए । अहिले अध्यक्ष पदमा उम्मेदवार बनेका पुरीले १८८ मतले पराजय बेहोर्नु परेको हो । पुरी यसअघि महासचिव थिए ।
सर्वसम्मत नेतृत्व चयन गर्ने प्रयास विफल भएपछि थेबे र पुरी प्यानल नै बनाएर निर्वाचनमा होमिएका थिए । मङ्गलवार बिहानदेखि विद्युतीय मतदान भएको थियो । महासचिवमा थेबे प्यानलका महेश चौलागाईंले ७ सय ५५ मत ल्याउँदा पुरी प्यानलका कुबेर अधिकारीले ६ सय ४९ मत प्राप्त गरे ।
थेबे प्यानलबाट उपाध्यक्षमा महाराज गुरुङ र विनय शाह, महासचिवमा महेश चौलागाईं, उपमहासचिवमा उपेन्द्र शाही, सचिवमा मदन भण्डारी र पुरी प्यानलका अरुण कुँवर, महिला सचिवमा निशा लिम्बु सुब्बा, मधेसी सचिवमा मोबिन अख्तर आलम विजयी भएका छन् ।
अनुशासन आयोग अध्यक्षमा मोहम्मद निजामुदिन (निजाम), निर्वाचन आयोग अध्यक्षमा मदन गिरी, लेखा आयोग अध्यक्षमा कृष्णदत्त जैसी, युवा विज्ञ परिषद्मा चीन लामा निर्वाचित भएका छन् । पुरी प्यानलबाट उपाध्यक्षमा प्रकाश गौतम र पर्वत भण्डारी, महासचिवमा कुबेर अधिकारी, उपमहासचिवमा खेमराज शर्मा, सचिव खुलामा अरुण कुँवर र ध्रुव खड्का, महिला सचिवमा रेशु तामाङ, मधेसी सचिवमा चितरञ्जन यादव उम्मेदवार थिए ।
अनुशासन आयोग अध्यक्षमा अजयजंग शाही, निर्वाचन आयोग अध्यक्षमा शिव रिमाल, लेखा आयोग अध्यक्षमा विक्रम गुरुङ, युवा विज्ञ आयोग अध्यक्षमा मोदनाथ सिलवाल (सन्तोष)ले पुरी प्यानलबाट उम्मेदवारी दिएका थिए ।
सङ्घको १० औँ अधिवेशनले १ सय ६३ जना निर्वाचित गर्नुपर्नेमा ६४ पदमा निर्विरोध निर्वाचित भएका थिए । मङ्गलवार भएको निर्वाचनमा देशभरबाट पोखरा आएका १ हजार ७६५ जनामध्ये १ हजार ४०४ जनाले मतदान गरेका थिए । अधिवेशनको उद्घाटन गत शुक्रवार प्रधानमन्त्री केपी शर्मा ओलीले गरेका थिए ।
