लेटाङको बरहजी मन्दिरमा दर्शानार्थीको घुईचो
मोरङ । लेटाङ नगरपालिका वडा नम्बर –७ वारङ्गीस्थित बरहाजी मन्दिरमा आज मङ्सिर पूर्णिमाको अवसरमा विशेष पूजाआजाको आयोजना गरिएको छ। सुनसरीको बरहाक्षेत्रभन्दा पनि पुरानो धार्मिक ऐतिहासिक पृष्ठभूमि बोकेको यस मन्दिरमा आज बिहानैदेखि दर्शणार्थीहरुको घुइँचो लागेको छ।
धार्मिक आस्थाका साथ भाकल गर्न, पूजाआजा गर्न र दर्शन गर्न लेटाङका स्थानीय बासिन्दासँगै पाँचथर, धनकुटा र सुनसरी लगायतका विभिन्न जिल्लाबाट भक्तजनहरू यहाँ आईरहेका छन्।
हरेक वर्ष मङ्सिर पूर्णिमाको दिन यस मन्दिरमा विशेष पूजाआजा पश्चात् मेला आयोजना गरिँदै आएको छ। सो मेलाले धार्मिक आस्थासँगै पर्यटन प्रवर्द्धन र स्थानीय उत्पादनको प्रचारप्रसारमा समेत महत्वपूर्ण भूमिका खेल्दै आएको स्थानीयहरूको भनाई छ।
बरहाजी मन्दिर क्षेत्रलाई ऐतिहासिक र धार्मिक दृष्टिले महत्वपूर्ण तीर्थस्थलको रूपमा लिइन्छ, जहाँ वर्षभरि भक्तजनहरूको आगमन निरन्तर रहने गरेको छ।
