जेनजी आन्दोलनका क्रममा इलाममा भएको तोडफोड तथा आगजनीमा संलग्न रहेको आरोपमा १५ जना पक्राउ
इलाम । जेनजी आन्दोलनक्रममा भदौ २३ र २४ गते इलाममा भएको तोडफोड तथा आगजनीमा संलग्न रहेको आरोपमा प्रहरीले १५ जनालाई पक्राउ गरेको छ। पक्राउ पर्नेमा इलाम, झापा र ताप्लेजुङका बासिन्दा रहेका छन्।
पक्राउ पर्नेमा राष्ट्रिय प्रजातन्त्र पार्टीका जिल्ला अध्यक्ष टीकाराम चौहानसहित इलामका विभिन्न वडा वासिन्दा रहेका छन्। जिल्ला प्रहरी कार्यालयका डिएसपी लक्ष्मी भण्डारीका अनुसार, पक्राउ परेकाहरूलाई जिल्ला अदालतबाट म्याद थप गरी अनुसन्धान भइरहेको छ।
जेनजी आन्दोलनको क्रममा इलामका सरकारी कार्यालय, पार्टी कार्यालय, प्रहरी पोस्ट, निर्वाचन कार्यालय, नगरपालिका कार्यालय, माई नगरपालिकाका कार्यालय र नेपाली सेनाको अतिथिगृहमा व्यापक तोडफोड तथा आगजनी भएको थियो।
इलाम नगरपालिकाले अनुमान गरेको अनुसार नगरपालिका कार्यालयमा मात्र करिब पाँच करोड रुपैयाँको क्षति भएको छ। अन्य कार्यालयहरूमा मोटरसाइकल, गाडी, कम्प्युटर, फर्निचर, कागजात र झ्याल ढोकामा क्षति पुगेको छ।
आन्दोलनपछि जारी विज्ञप्तिमा जेनजी समूहले आफूहरूले शान्तिपूर्ण आन्दोलन गर्ने बताए पनि तोडफोड र आगजनी भएको भन्दै विध्वंश मच्चाउनेको छानबिन गरी कारबाहीको माग गरेका छन्।
