संखुवासभाको खाँदबारीमा मुख्य निर्वाचन अधिकृतको कार्यालय स्थापना
संखुवासभा,२ माघ । संखुवासभाको खांदबारी स्थित नयाबजारमा मुख्य निर्वाचन अधिकृतको कार्यालय स्थापना गरिएको छ । आगामी निर्वाचनलाई निष्पक्ष, स्वतन्त्र र पारदर्शी रूपमा सम्पन्न गर्ने उद्देश्यले कार्यालय स्थापना गरिएको हो ।
जिल्ला न्यायाधीश राज कुमार कोइराला मुख्य निर्वाचन अधिकृतका रूपमा तोकिएसँगै निर्वाचनसम्बन्धी सम्पूर्ण काम उक्त कार्यालयबाट सञ्चालन हुने भएको छ ।
कार्यालय स्थापनापछि उम्मेदवारी दर्ता, निर्वाचन कार्यक्रम कार्यान्वयन, मतदाता तथा सरोकारवाला पक्षसँगको समन्वय, गुनासो सुनुवाइलगायतका कार्यहरू प्रभावकारी रूपमा अघि बढाइने जनाइएको छ ।
निर्वाचन प्रक्रियालाई शान्तिपूर्ण र विश्वासयोग्य बनाउन स्थानीय प्रशासन, सुरक्षानिकाय तथा सम्बन्धित निकायसँग सहकार्य गरिने मुख्य निर्वाचन अधिकृत कोइरालाले बताउनुभयो।-खांदबारी एफ एम
