विराटनगरबाट लागू औषध ब्राउन सुगर र प्रतिबन्धित औषधी सहित दुई जना पक्राउ
मोरङ, ७ माघ । मोरङको विराटनगर महानगरपालिका-४ नहर सडकको छेउबाट लागू औषध ब्राउन सुगर र प्रतिबन्धित औषधी सहित २ जनालाई प्रहरीले पक्राउ गरेको छ ।
माघ ६ गते लागू औषध नियन्त्रण ब्युरो विराटनगर र जिल्ला प्रहरी कार्यालय मोरङबाट खटिएको प्रहरी टोलीले को. ३७ प ३३६६ नम्बरको मोटरसाईकलमा शंकास्पद गतिबिधि गरी रहेका सुनसरीको भोक्राहानरसिंह गाउँपालिका-५ का ३५ बर्षीय सुदिन मन्सुरीलाई चेकजाँचमा गर्दा ज्याकेटमा लुकाई छिपाई राखेको १ सय ४० ग्राम ब्राउन सुगर फेला पारी पक्राउ गरेको थियो ।
मन्सुरीलाई पक्राउ गरे संगै कारोबारमा संलग्न इटहरी-५ का ५० बर्षीय रोहित कार्कीलाई इलाका प्रहरी कार्यालय इटहरीको सहकार्यमा कार्कीकै कोठाबाट १४ ग्राम २३ मिलिग्राम ब्राउन सुगर, प्रतिबन्धित औषधी नाईट्राजाम ४६० ट्याब्लेट, कोरेक्स १८ बोतल र स्पास्मोप्रोक्सिवन ३३६ क्यापसुल फेला पारी नियन्त्रणमा लिएको हो ।
पक्राउ परेका उनिहरुको जिल्ला प्रहरी कार्यालय मोरङबाट थप अनुसन्धान भईरहेको छ ।
