ओखलढुंगामा चलाइयो स्वीप अपरेशन
ओखलढुंगा । ओखलढुंगाको सिद्धिचरण नगरपालिका ४ को चार्खु, कालीबेली जंगलमा अपरिचित व्यक्तिहरु शंकास्पद तरिकाले हिँड्डुल गरेको सूचना आएपछि आज ओखलढुंगाका प्रमुख जिल्ला अधिकारी मेखबहादुर मंग्रातीको कमाण्डमा स्वीप अपरेशन चलाइएको छ ।
हिजो स्थानीयले चार्खु, कालीबेली जंगलमा ४/५ जना अनुहार नचिनिने गरी छोपेका अपरिचित मानिसहरु शंकास्पद तरिकाले हिँडडुल गरेको देखेपछि प्रशासनलाई खबर गरेका थिए । त्यसलगत्तै आज प्रजिअ मंग्रातीसहित जिल्लाका सुरक्षा निकायका प्रमुखहरुको उपस्थितिमा स्वीप अपरेशन चलाइएको हो ।
अपरेशनमा प्रजिअ मंग्रातीको कमाण्डमा प्रहरी नायब उपरीक्षक मदन केसी, सशस्त्र प्रहरी बलका सशस्त्र पहरी नायब उपरीक्षक महेश विक्रम केसी र दुर्गाबक्स गणका प्रमुख सेनानी सुरेन्द्र देउजाको कमाण्डमा ४० जनाको टोलीले संयुक्त अपरेशन गरेको थियो ।
प्रहरीले दिएको जानकारी अनुसार शंकास्पद व्यक्तिहरूसँग हातहतियार हुन सक्ने तथा उक्त स्थानमा पछिल्लो समयमा क्रमबद्व घटेको घटनालाई मध्यनजर गरी उक्त अपरेश गरिएको हो ।
