फेवातालमा माछा मार्दा एसएलआर र १८ राउण्ड गोली भेटिएपछि…
पोखरा । फेवातालमा माछा मार्ने क्रममा एक थान एसएलआर राइफल र त्यसमा प्रयोग हुने १८ राउण्ड गोली फेला परेको छ । गत मंगलबार साँझ खपौदीस्थित फेवातालमा जाल हान्ने क्रममा हतियार फेला परेको जिल्ला प्रहरी कार्यालय कास्कीले जानकारी दिएको छ ।
स्थानीय ४२ वर्षीय कुमार जलारीले माछा मार्नका लागि जाल फाल्दा जालमा हतियार अड्किएर निस्किएको थियो । जालमा राइफल फेला परेको सूचना पाउनासाथ वडा प्रहरी कार्यालय बैदाम र जिल्ला प्रहरी कार्यालय कास्कीबाट प्रहरी टोली घटनास्थलमा पुगेको थियो ।
बरामद गरिएको हतियारको बडी नं. १३८१० र ’मु वा १११ (बट)’ नम्बर उल्लेख भएको कास्की प्रहरी प्रवक्ता डीएसपी हरीबहादुर बस्नेतले जानकारी दिए ।
उनका अनुसार उक्त हतियारसँगै एक थान म्यागजिन र त्यसमा लोड गरिएको अवस्थामा १८ राउण्ड गोली समेत बरामद गरिएको छ । हतियार तालमा कसरी पुग्यो भन्नेबारे थप अनुसन्धान भइरहेको बस्नेतले बताए ।
